कमल पौडेल, प्युठान ।
अखिल नेपाल शिक्षक संघका महासचिव चक्रपाणि पौडेलले शिक्षालाई राज्यले स्रोतको रुपमा नहेरी दायित्वको रुपमा लिनुपर्ने बताउनुभएको छ ।
अखिल नेपाल शिक्षक संघ मल्लरानी गाउँपालिकाको दोस्रो परिषद बैठकको उद्घाटन गर्दै महासचिव पौडेलले समाज बदल्ने मुख्य जिम्मेवारी शिक्षकको काँधमा रहेकोले सोही अनुसार काम गर्न शिक्षकहरुलाई आग्रह गर्नुभयो ।
महासचिव पौडेलले भन्नुभयो, ‘राज्यले शिक्षालाई स्रोतको रुपमा नहेरी दायित्वको रुपमा लिनुपर्छ । शिक्षा नीति र शैक्षिक व्यवस्थापनमा समय सापेक्ष परिवर्तन आवश्यक छ ।’
उहाँले व्यवहारिक, वैज्ञानिक र प्राविधिक शिक्षा सहितको निःशुल्क, अनिवार्य र गुणस्तरीय शिक्षाको ग्यारेन्टी सरकारले गर्नुपर्ने बताउनुभयो ।
पौडेलले अखिल नेपाल शिक्षक संघ २०४३ सालमा स्थापना भएको स्मरण गर्दै त्यसयता लगातार शिक्षकको हकहित र शैक्षिक सुधारमा संघर्षरत रहेको बताउनुभयो ।
साथै, उहाँले नेपालका राजनीतिक दलहरुमध्ये नेकपा (मसाल) र राष्ट्रिय जनमोर्चा नै विचार र सिद्धान्तमा स्पष्ट रहेको उल्लेख गर्दै राजमोले लिएको नीतिले नै शिक्षालाई व्यवहारिक एवम् जनताको पहुँचमा पुर्याउन सक्ने स्पष्ट पार्नुभयो ।
कार्यक्रममा राष्ट्रिय जनमोर्चाका केन्द्रीय सदस्य तथा प्युठान जिल्ला अध्यक्ष कृष्ण बहादुर खड्का, लुम्बिनी प्रदेश अध्यक्ष बोम बहादुर खत्री, राजमो लुम्बिनी प्रदेश सल्लाहकार सुरेस थापा, मल्लरानी गाउँपालिकाका अध्यक्ष अम्मरध्वज राना, अखिल नेपाल युवक संघका केन्द्रीय सदस्य एवम् जिल्ला अध्यक्ष कमल पौडेलले मन्तव्य राख्दै परिषद बैठक सफलताको सुभकामना दिनुभएको थियो ।
अखिल नेपाल शिक्षक संघ मल्लरानीका अध्यक्ष कुलराज पौडेलको अध्यक्षतामा अगाडि बढेको कार्यक्रम अस्मिता बिसीको स्वागत र कृष्ण केसीको सञ्चालमा सम्पन्न भएको थियो ।
