काठमाडौँ । दोलखा जिल्लाको मेलुङ गाउँपालिका वडा नं. ५ डाँडाखर्क माध्यमिक विद्यालयमा एक दिवसीय शिक्षकहरूको क्षमता अभिवृद्धि तालिम सम्पन्न भएको छ ।
विद्यालय व्यवस्थापन समितिका अध्यक्ष सूर्यबहादुर थापाको अध्यक्षतामा २०७८ चैत २५ गते शुक्रबार सम्पन्न उक्त कार्यक्रमको प्रमुख अतिथि मेलुङ गापाका वडाध्यक्ष मानबहादुर मगर हुनुहुन्थ्यो ।
तालिम कार्यक्रमको उद्घाटन प्रमुख अतिथि थापाले र स्वागत विद्यालयका प्रधानाध्यापक प्रवीण मोक्तानले गर्नुभएको थियो । सो अवसरमा समाजसेवी उद्धव थापामगर, विद्यालय व्यवस्थापन समितिका पूर्व अध्यक्ष अर्जुनबहादुर थापा, वडासदस्य टेकबहादुर थापालगायतका अतिथिको आतिथ्य रहेको थियो ।
तालिमको विषय “शिक्षण एवम् शिक्षण पेसा : एक सामूहिक पुनरावलोकन” थियो । तालिमको सहजकर्ता त्रिभुवन विश्वविद्यालयका सहप्राध्यापक डा. चूडा ढकाल हुनुहुन्थ्यो । विद्यालयका शिक्षक व्यवस्थापन समितिका पदाधिकारी तथा स्थानीय जनप्रतिनिधि र अभिभावकसमेत सहभागी भएको तालिम कार्यक्रममा नमुना तालिम तथा अनुसन्धान प्रालिको तर्फबाट प्रमाणपत्र वितरण गरिएको थियो ।
कार्यक्रमकै बिच समाजसेवी उद्धव थापाले आफ्नो तर्फबाट विद्यालयका लागि खेल सामग्री हस्तान्तरण गर्नुभएको थियो । त्यसैगरी आधारशिला कलेजका अध्यक्ष भोला ढकालले विद्यालयको पुस्तकालयको लागि प्रकाशन हस्तान्तरण गर्नुभएको थियो ।
तालिम कार्यक्रमको समापनको सन्दर्भमा एक सङ्क्षिप्त कार्यक्रम सम्पन्न भएको थियो । सो अवसरमा सहभागी शिक्षकहरूको तर्फबाट दुई जना प्रतिनिधिले तालिम कार्यक्रमको बारेमा धारणा राख्नुभयो । तालिमको आयोजक, प्रायोजक तथा प्रशिक्षकलाई विद्यालयका
प्रधानाध्यापक प्रवीण मोक्तान र आयोजकको तर्फबाट कार्यक्रमका संयोजक रमेश पौडेलले धन्यवाद ज्ञापन गर्नुभयो ।
सो अवसरमा आधारशिला कलेजका अध्यक्ष भोला ढकालले पनि सङ्क्षिप्त राख्नुभएको थियो ।
