जगत प्रसाद रेग्मी, काठमाडौं ।
जातीय समता समाजका अध्यक्ष एवम् राष्ट्रिय सभाका सांसद तुलप्रसाद विश्वकर्मा (राजेश) ले विवादित अमेरिकी सहाययता परियोजना एमसीसी संसदबाट जवर्जस्ती पास गरे पनि नेपाली जनताले स्वीकार नगरेको बताउनुभएको छ ।
शुक्रबार काठमाडौंमा जातीय समता समाजसहित विभिन्न दलित संघ, संगठनहरुले आयोजना गरेको एमसीसीविरुद्धको सभामा बोल्दै राष्ट्रिय सभा सदस्य विकले संसदमा नक्कली बहुमत देखाएर एमसीसी पास गरिएको आरोप लगाउनुभयो ।
उहाँले विगतमा राष्ट्रिय जनमोर्चाले संघीयता लागू गर्नु हुँदैन भन्दा त्यसलाई अस्वीकार गरिएको र अहिले संघीयताका दुस्परिणामहरु देखिन थालेको बताउनुभयो । संघीयता र एमसीसी दुवै देशको लागि घातक हुने उहाँको भनाई थियो ।
फरक प्रशंगमा नेता विकले अहिलेको २१ औँ शताब्दीमा पनि मान्छे मान्छेबीच विभेद रहेको भन्दै जनता सचेत भएर विभेदविरुद्ध संघर्ष जारी राख्नुपर्ने बताउनुभयो ।
कार्यक्रममा नेपाल राष्ट्रिय दलित मुक्ति मोर्चाको तर्फबाट जात व्यवस्था उन्मुलन मोर्चा नेपालका केन्द्रीय सदस्य रुपा सुनार, श्रमिक समुदाय मोर्चाका महासचिव त्रिलोचन विश्वकर्मा, नेपाल दलित मुक्ति मोर्चाका संयोजक अम्मर परियारले पनि बोल्नु भएको थियो ।
कार्यक्रमको संचालन जातीय समता समाजका महासचिव भक्त बहादुर विश्वकर्माले गर्नु भएको थियो ।
