टेकराज भुसाल, अर्घाखाँची ।
अर्घाखाँची जिल्लाको भूमिकास्थान नगरपालिका वार्ड नम्बर १ र २ को ढाकावाङ्गमा दोस्रो पिपलनेटा खुल्ला भलिबल प्रतियोगिता आजदेखि सुरु भएको छ।
पिपलनेटा बजार विकास संस्था भूमिकास्थान नगरपालिका १ र २ को संयुक्त आयोजनामा सुरु भएको दोस्रो पिपलनेटा खुल्ला भलिबल प्रतियोगिताको भूमिकास्थान नगरपालिकाका प्रमुख रेशम थापाले उद्घाटन गर्नुभयो ।
कार्यक्रममा नगर प्रवक्ता बाबुराम पन्थी सुनार, भूमिकास्थान १ का वडाध्यक्ष भोजराज खनाल, २ का वडाध्यक्ष बुद्धिबहादुर थापा, ५ का वडाध्यक्ष तुल्सिराम बेल्वासे, राष्ट्रिय जनमोर्चा अर्घाखाँचीका सदस्य कविराम खनाल, नेकपा (एमाले) भूमिकास्थान नगर उपाध्यक्ष चिरञ्जीवी खनाल लगायतको आतिथ्यता रहेको थियो ।
उद्घाटन समारोह पिपलनेटा बजार विकास संस्थाका अध्यक्ष तिलक खनालको अध्यक्षता, विष्णु शर्माको सञ्चालन र टेकराज भुसालको स्वागत मन्तव्यबाट अघि बढेको थियो ।
चैत ५ गतेसम्म सञ्चालन हुने प्रतियोगितामा ८ टिमको सहभागिता रहेको छ । उक्त प्रतियोगितामा प्रथम हुने टिमले रु ५१ हजार ५ सय, द्वितिय हुने टिमले ३१ हजार ३ सय र तृतीय हुने टिमलाई २१ हजार १ सय सँगै मेडल ट्रफि र प्रमाणपत्र प्रदान गरिने आयोजकले जनाएको छ ।
यस्तै, उत्कृष्ट खेलाडी, अनुशासन र उत्कृष्ट पत्रकार सम्मान पुरस्कार जनही ३५ सय रुपैयाँ रहेको आयोजक पिपलनेटा बजार विकास संस्थाले जनाएको छ।
