काठमाडौं । राष्ट्रिय जनमोर्चाले स्थानीय निर्वाचनमा प्रतिगमन विरोधी राजनीतिक दलहरुबीच गठबन्धन हुनुपर्नेमा जोड दिएको छ ।

सत्तारुढ चार दलले एमसीसी जवर्जस्ती संसदबाट पास गरेपछि गठबन्धनबाट बाहिरिएको राजमोले स्थानीय निर्वाचनमा पाँच दलबीच सहकार्य गर्ने इच्छा जाहेर गरेको हो ।

महासचिव मनोट भट्टले बुधबार एक विज्ञप्ति प्रकाशित गरी स्थानीय तहमा प्रतिगमन विरोधी दलहरुबीच पारस्परिक सहमतिमा सिटहरु सन्तुलित प्रकारले विभाजन गर्न आग्रह गर्नुभएको छ ।

अर्घाखाँची जिल्लामा स्थानीय निर्वाचनमा संयुक्त रुपमा मिलेर जान राजमोसहित पाँच दल बीचमा भएको सहमतिलाई पनि राजको केन्द्रीय समितिले स्वागत गरेको छ ।

वक्तव्यमा भनिएको छ :
‘पाँच दलीय गठबन्धन तथा सरकारले राष्ट्रघाती एमसीसी सम्झौता संसदबाट पारित गराएको थियो । पाँच दलीय गठबन्धनले एमसीसी पारित गराउन खेलेको भूमिकाका कारण नै हाम्रो दलले पाँच दलीय गठबन्धनबाट अलग हुने निर्णय लिनु परेको थियो ।

एमसीसी विवादका कारण राष्ट्रिय जनमोर्चा पाँच दलीय गठबन्धनबाट अलग भए पनि प्रतिगमनका विरुद्ध यो गठबन्धनको महत्व रहेको कुरामा हामीले हाम्रो मत स्पष्ट गर्दै आएका छौँ । हामी पाँच दलीय गठबन्धनबाट हटेको भए पनि स्थानीय निर्वाचनमा प्रतिगमनलाई परास्त गर्न गठबन्धनमा आबद्ध दलहरुसँग चुनावी तालमेल गर्ने हाम्रो नीति रहेको छ ।

हामीले त्यसका लागि आफ्नो तर्फबाट इमान्दारीपूर्वक प्रयत्न गर्नेछौँ । यदि पाँच दलीय गठबन्धनका बीच चुनावी तालमेल हुन नसकेमा वा नभएमा देश प्रतिगमनका साथै अधिनायकवादतिर जाने खतराप्रति पनि सबैको ध्यान आकर्षित गर्दछौँ ।

अर्घाखाँची जिल्लामा प्रतिगमनलाई परास्त गर्नका लागि स्थानीय निर्वाचनमा संयुक्त रुपमा मिलेर जान हाम्रो दलसहित पाँच दलका बीचमा सहमति भएको छ । चैत्र ११ गतेदेखि प्रतिगमनका विरुद्ध अर्घाखाँचीमा संयुक्त अभियान संचालन गर्ने सहमति पनि भएको छ ।

उक्त सहमतिलाई हामीले सकारात्मक रुपमा लिंदै स्वागत गर्दछौँ । एमालेको नेतृत्वमा देखा परेको प्रतिगमनका विरुद्ध यो सहमतिले चुनावी तालमेल तथा प्रतिगमनका विरुद्ध वातावरण तयार पार्न मद्दत पुग्ने छ ।

त्यस सिलसिलामा यो कुरामाथि सम्बन्धित सबैको ध्यान जानु पर्दछ कि, स्थानीय चुनावमा सीटहरुको विभाजनमा सहमति बन्न सकेमा नै अर्घाखाँचीमा भएको सहमति र संयुक्त अभियानको कार्यक्रमले सार्थक परिणाम दिन सक्ने छ ।

पारस्परिक सहमति र समझदारीका आधारमा स्थानीय तहका सीटहरुको सन्तुलित प्रकारले विभाजन हुन सकेमा नै अहिले कायम सहमति सुदृढ हुनेछ र प्रतिगमनलाई पराजित गर्नु सम्भव हुनेछ । त्यसका लागि ध्यान दिन हामी सम्बन्धित सबै पक्षलाई अपील गर्दछौँ ।’
धन्यवाद !
मिति : २०७८ चैत्र २
मनोज भट्ट
महासचिव