नेपालगञ्ज । कल्पना फाउन्डेसन नेपालको आयोजना तथा सिर्जनशील संस्था नेपालको सहयोगमा ज्ञानोदय नमुना मावि खजुरा बाँकेमा महिनाबारीमा प्रयोग हुने किट ब्याग वितरण गरिएको छ ।
२०७८ फागुन ३० गते आयोजित उक्त कार्यक्रममा सय जनाभन्दा बढी महिलाहरूको सहभागिता रहेको थियो । सहभागी सम्पूर्ण महिलाहरूलाई करिब दुई लाख पचास हजार बराबरको निःशुल्क रूपमा महिनाबारीसम्बन्धी किट ब्याग वितरण गरिएको थियो ।
सो अवसरमा महिलाहरूलाई महिनाबारी सरसफाइ, स्वच्छता, मनोशिक्षा , रजोनिवृत्ति व्यवस्थापनसम्बन्धी चार घन्टाको तालिमसमेत सञ्चालन गरिएको को थियो ।
कार्यक्रमको अध्यक्षता कल्पना फाउन्डेसन नेपालकी अध्यक्ष कल्पना पौडेल जिज्ञासुले गर्नुभएको थियो भने वडाअध्यक्ष कान्तिमा गौतमको प्रमुख आतिथ्य तथा सिर्जनशील संस्था नेपालकी अध्यक्ष प्रतिमा शर्मा र प्रधानाध्यापक ऋषिराम सापकोटाको विशिष्ट आतिथ्य रहेको थियो ।
कार्यक्रमको सञ्चालन इन्दिरा गौतमले गर्नुभएको थियो भने तालिमको सहजीकरण सिर्जनशील संस्थाकी अध्यक्ष प्रतिमा शर्मा र कार्यक्रम संयोजक प्रतिमा पन्थीले गर्नुभएको थियो ।
