काठमाडौं । उपत्यकाको विभिन्न स्थानमा जब सेन्टरहरू स्थापना गरी विभिन्न काममा जागिर लगाईदिने बहानामा ठगी गर्ने नौ जनालाई प्रहरीले पक्राउ गरेको छ ।
पक्राउ पर्नेहरूमा अर्घखाँचीको छत्रदेव गाउँपालिका–६ ठुलापोखरी घर भई हाल भक्तपुरको लोकन्थली बस्ने नयाँ बानेश्वर स्थित ‘सोसाइटी वेलफेयर फ्यासिलिटीज म्यानेजमेन्ट सर्विसेज’ का सञ्चालक वर्ष २६ को अमर पाण्डे, अर्घाखाँचीकै वर्ष ३२ को तिलकराम पाण्डे, लमजुङको दुधपोखरी गाउँपालिका–२ घर भई हाल बालाजु स्थित ‘दुध पोखरी जब प्लेसमेन्ट एण्ड ट्रेनिङ सेन्टरका सञ्चालक वर्ष २२ को आनन्द मरहठ्ठा रहेका छन्।
यस्तै, सिराहाको सिराहा नगरपालिका–१९ घर भई हाल कोटेश्वर स्थित ‘एनएन मल्टिप्रपोज प्रालि’ का सञ्चालक वर्ष २३ को विवेक यादव, ओखलढुङगाको सिद्दिचरण नगरपालिका–३ अधेँरी घर भई हाल कपन आकाशेपुल स्थित ‘एबीएस जब एण्ड ट्रेनिङ सेन्टर’ र ‘हलेसी सेक्युरिटी सर्भिस प्रालि’ का सञ्चालक वर्ष २८ का अश्विन राई, सिन्धुली फिक्कल गाउँपालिका–२ घर भई कोटेश्वर स्थित सिन्धु रोजगारी सेवाका सञ्चालक वर्ष २२ का घनश्याम पहाडीलाई पनि प्रहरीले पक्राउ गरेको छ।
यसैगरी रौतहटको चन्द्रपुर नगरपालिका–४ घर भई हाल चाबहिल स्थित प्राश्ना जब ईन्टरनेशनल मल्टिप्रपोज प्रालिका सञ्चालिका वर्ष २५ की सृजना लामिछाने, मोरङको विराटनगर उपमहानगरपालिका–४ घर भई हाल कोटेश्वर स्थित क्वीकमाण्डु एमपी प्रालिका सञ्चालिका वर्ष ४० की ज्ञानु न्यौपाने र रौतहट मौलापुर गाउँपालिका–५ घर भई हाल कोटेश्वर स्थित अनमोल जब मल्टिपल प्रालिका सञ्चालक वर्ष २२ का रामवचन कुमार यावदलाई पनि प्रहरीले पक्राउ गरेको छ।
महानगरीय अपराध महाशाखाबाट खटि गएको विशेष प्रहरी टोलीले काठमाडौंको कोटेश्वर, नयाँबानेश्वर, चाबहिल, बालाजु लगाएतका स्थानबाट ठगीमा सक्रिय ब्यक्तिहरूलाई पक्राउ गरेको हो । पक्राउ परेकालाई आवश्यक कारबाहीको लागि महानगरीय प्रहरी वृत्त नयाँबानेश्वर र बालाजुमा पठाइएको महाशाखाले जनाएको छ।
ती जब सेन्टरहरुले विभिन्न स्थानमा जब प्लेसमेन्ट कम्पनिहरु दर्ता गर्ने र उक्त कम्पनीहरुले सामाजिक सञ्जाल, पत्रपत्रिका, प्रचारपम्पलेटका माध्यमबाट घरमै बसी जागिर मिल्छ भनि प्रचारप्रसार गर्ने तथा जागिरका लागि उक्त जब सेन्टरको सम्पर्कमा आउने व्यक्तिहरुलाई फारम भर्ने बहानामा रु ३०० देखि रु ५०० सम्म फारम चार्ज तथा १०००।– देखि ६०००।– सम्म जब ग्यारेन्टी शुल्क लिने गरेको पाइएको छ।
यस्तै, फारम भर्ने व्यक्तिहरुलाई विज्ञापनमा उल्लेखित शर्त बमोजिमको काममा नलगाउने तथा जागिरमा लगाई हाले पनि तोकिए बमोजिम तलब र सुविधा नदिई केही समयमानै उक्त जागिर छोड्न बाध्य बनाउने गरेको पाइएको अनुसन्धानका क्रममा खुलेको छ।
कुनै एक जब सेन्टरमा फारम दर्ता गरिसकेको व्यक्तिलाई तपाईंको जागिर पक्का भइसकेको छ भनि एक जब सेन्टरबाट अर्को जब सेन्टरमा पठाई त्यहाँ समेत फारम शुल्क असुल्ने गरेको पाइएको छ।
साथै, प्रहरीले उपत्यकाका विभिन्न स्थानमा जागिर लगाईदिने प्रलोभनमा ठगि भइरहेको पाइएकाले रोजगारदाता कम्पनीको पृष्ठभूमि अध्ययन गर्न पनि सम्बन्धित सबैमा अनुरोध गरेको छ।
