शङ्करप्रसाद पोख्रेल, तमघास ।
राष्ट्रिय जनमोर्चा गुल्मीको आयोजनामा गुल्मीको कालीगण्डकी गाउँपालिकामा स्थानीय तहको चुनावी भेला २०७८ फागुन २३ गते उद्घाटन कार्यक्रम सम्पन्न भएको छ ।
भेलाको उद्घाटन गर्दै कार्यक्रमका प्रमुख अतिथि मनोज भट्टले अहिले दुई खाले अतिवादसित नेपाली जनताले सङ्घर्ष गर्नुपरिरहेको बताउनुभयो । अझै पनि प्रतिगमन खतरा रहेकाले प्रतिगामी शक्ति र त्योभन्दा पनि खतरा राष्ट्रघाती एम.सी.सी. विरुद्ध सङ्घर्ष गर्नुपर्ने बताउनुभयो ।
राष्ट्रघाती एम.सी.सी. अमेरिकी साम्राज्यवादका दलालहरूले नाटकीय शैलीमा संसद्बाट पास गरेको भन्दै जनताको आन्दोलनले त्यो राष्ट्रघाती सम्झौता खारेज गर्नुपर्ने बताउनुभयो ।
कार्यक्रममा राजमो केन्द्रीय सचिव हिमलाल पुरी, राजमो केन्द्रीय सदस्य रामकुमार क्षेत्री, केन्द्रीय सदस्य तथा कालीगण्डकी गाउँपालिकाकी उपाध्यक्ष तारा थापाक्षेत्री, राजमो गण्डकी प्रदेश सांसद पियारी थापा, अखिल नेपाल शिक्षक सङ्घका कृष्ण ढकाल, प्रगतिशील पत्रकार सङ्घ गुल्मीका अध्यक्ष हरि न्यौपाने, नेकपा (मसाल) गुल्मी जिल्ला प्रवक्ता ओमेन्द्र कुँवरलगायतले शुभकामना मन्तव्य राख्नुभएको थियो ।
सो अवसरमा सैद्धान्तिक तथा राजनीतिक प्रशिक्षण दिइएको थियो । कार्यक्रममा राजमो महासचिव मनोज भट्ट, सचिव हिमलाल पुरीलगायतले प्रशिक्षण दिनुभएको थियो।
राष्ट्रिय जनमोर्चा गुल्मीका अध्यक्ष जीवन रानाको अध्यक्षता तथा जिल्ला सचिव छविलाल सर्तुङीको सञ्चालन र राष्ट्रिय जनमोर्चा जिल्ला सदस्य गुमानसिंह पुनको स्वागत भाषणबाट कार्यक्रम अगाडि बढेको थियो ।
कार्यक्रमको बिच बिचमा रक्तिमका कलाकारहरूले नो एम.सी.सी. लगायतका जनवादी गीत र नृत्य प्रस्तुत गरेका थिए । भेलामा गुल्मी जिल्लाभरिका स्थानीय तहका राष्ट्रिय जनमोर्चाका प्रतिनिधिहरूको उपस्थिति रहेको थियो ।
