काठमाडौं । राष्ट्रिय सभाका २० सांसद चार वर्षे कार्यकाल पूरा गरेर शुक्रबारबाट बिदा भएका छन्। चार वर्षे कार्यकाल सकिनेमा १९ जना निर्वाचित र एकजना सरकारको सिफारिसमा राष्ट्रपति विद्यादेवी भण्डारीले मनोनित गरेका छन्।
विदा हुनेमा नेकपा एमालेका ८, नेकपा माओवादी केन्द्रका र नेकपा एकीकृत समाजवादीका ४–४, नेपाली कांग्रेसका ३ र मनोनीत १ सांसद छन्। २०७५ असार ४ गते भएको गोलाप्रथा अनुसार उनीहरुको चार वर्षीय पदावधि कायम भएको थियो।
संसद सचिवालयका अनुसार चार वर्षीय पदावधि सकिएका एमाले सांसदमा अगमप्रसाद बान्तावा राई, कविता बोगटी, कोमल वली, चक्रप्रसाद स्नेही, नैनकला ओझा, परशुराम मेघी गुरुङ, रामलखन चमार र सुमनराज प्याकुरेल छन्।
माओवादी केन्द्रका खिमबहादुर विक, जीवन बुढा, दिनानाथ शर्मा, शशिकला दाहाल र रामनारायण बिडारीको पनि पदावधि समाप्त भएको। बिडारी तत्कालीन नेकपा नेतृत्वको सरकारको सिफारिसमा राष्ट्रपति भण्डारीद्वारा मनोनित राष्ट्रियसभा सदस्य हुन्।
एमालेबाट चोइटिएर गठन भएको एकीकृत समाजवादीमा गएका उदया शर्मा पौडेल, ठगेन्द्रप्रसाद पुरी, शान्तिकुमारी अधिकारी र शेरबहादुर कुँवर र कांग्रेसका दृगनारायण पाण्डेय, तारादेवी भट्ट र राधेश्याम अधिकारीको पनि चार वर्षीय पदावधि सकिएको छ।
माओवादी सांसद् चन्द्रबहादुर खड्का पार्टी परित्याग गरी एमालेमा गएपछि कारबाहीमा परेका थिए। उनको स्थानमा २०७८ जेठ १७ गते भएको उपनिर्वाचनमा कांग्रेसका पाण्डे विजयी भएका थिए।
कार्यकाल सम्हालेको ८ महिनामात्रै पूरा भए पनि खड्काकै स्थानमा निर्वाचित भएका कारण उनको कार्यकाल पनि फागुन २० मा सकिएको संसद सचिवालयले जनाएको छ।
