काठमाडौं । राष्ट्रिय जनमोर्चाका अध्यक्ष चित्रबहादुर केसीले कतिपय सञ्चारमाध्यले एमसीसी सम्बन्धमा आफ्नो भनाई भन्दै बोल्दै नबोलेका कुरा लेखेर पित पत्रकारिता गरेको आरोप लगाउनुभएको छ ।

सरकारद्वारा तयार पारिएको ‘एमसीसीको व्याख्यात्मक प्रस्ताव एक कदम सकारात्मक’ भनी आफूले कहिँ नबोलेको केसीले स्पष्ट पार्नुभएको छ ।

एमसीसीविरुद्ध पार्टीले लिएको दृढ अडान, संसदमा राजमोले विपक्षमा गरेको मतदान तथा एमसीसी पास गर्ने सरकारको षडयन्त्रविरुद्ध नेपाल बन्द जस्ता संघर्षका कार्यक्रम आयोजना गरेको देख्दादेख्दै आफू विरुद्ध भ्रम फैलाएर कतिपयले साम्राज्यवादीको सेवा गरेको केसीले बताउनुभएको छ ।

केसीले सोमबार विज्ञप्ति प्रकाशित गरी भन्नुभएको छ,
सरकारद्वारा तयार पारिएको “एमसीसीको व्याख्यात्मक प्रस्ताव एक कदम सकारात्मक” भनेर मैले प्रतिक्रिया दिएको भनि कतिपय सञ्चार माध्यम र सामाजिक सञ्जालमा प्रकाशित सामाग्रीप्रति मेरो गम्भीर ध्यानाकर्षण भएको छ । सरकारबाट संसदमा प्रस्तुत गर्नका लागि तयार पारेको एमसीसी सम्झौताको व्याख्यात्मक प्रस्तावलाई सकारात्मक भनेर कुनै पनि प्रकारको विचार मैले प्रकट गरेको छैन । मैले बोल्दै नबोलेको विषयलाई मेरो विचारको रुपमा प्रचार गर्ने कार्य गलत त छँदै छ त्यसका साथै त्यो हद दर्जाको पितपत्रकारिता पनि हो ।

एमसीसीका विरुद्ध राष्ट्रिय जनमोर्चाले शुरुदेखि नै विरोध तथा संघर्ष गर्दै आएको कुरा सबैलाई जगजाहेर नै छ । हिजो संसदभित्र समेत राष्ट्रिय जनमोर्चाका सांसदले एमसीसी सम्झौता र राष्ट्रलाई गुमराहमा पार्न ल्याइएको सम्झौताको व्याख्यात्मक प्रस्तावको कडा विरोध गर्नुका साथै त्यसको विपक्षमा नै मतदान गरेको छ । संसदद्वारा पारित एमसीसी र त्यसको कथित व्याख्यात्मक प्रस्तावका विरुद्ध राष्ट्रिय जनमोर्चाले फागुन १६ गते ने।क।पा। ९मसाल० सहितका दलसँग नेपाल बन्द आव्हान समेत गरेको छ ।

यी सबै कुरा स्पष्ट हुँदा हुँदै पनि मेरो विषयमा भ्रम पार्न खोज्ने हर्कतका पछाडि साम्राज्यवादीहरुको प्रत्यक्ष/अप्रत्यक्ष सेवा नै हो । एमसीसी र कथित व्याख्यात्मक प्रस्तावको म र हाम्रो दल दृढरुपमा विरुद्धमा रहेको छ । मेरो र हाम्रो दलको विषयमा कुनै पनि प्रकारको भ्रममा नपर्न मैले सम्पूर्ण पार्टी पंक्ति, शुभेच्छुक, समर्थक तथा आम देशभक्त नेपाली जनतामा अपील गर्दछु ।
धन्यवाद !

मितिः २०७८ फागुन १६
चित्रबहादुर केसी