काठमाडौँ । नेकपा (मसाल) ले एम.सी.सी. पारित गराउने सबै गतिविधि बन्द गर्न सबैको ध्यान आकर्षण गराएको छ । त्यसका साथै पार्टीले पाँचदलीय गठबन्धनलाई बचाउन पनि सबै पक्षलाई आग्रह गरेको छ ।
महामन्त्री मोहनविक्रम सिंहको हस्ताक्षरमा २०७८ फागुन १४ गते प्रसारित प्रेसवक्तव्यमार्फत् पार्टीले यस्तो अवधारणा सार्वजनिक गरेको हो ।
पार्टीले वक्तव्यमा युक्रेनमाथि रुसी साम्राज्यवाद र अमेरिकी साम्राज्यवाद दुवैको स्वार्थका कारणले आक्रमण भइरहेको बताएको छ । रुस र अमेरिकाको साम्राज्यवादी स्वार्थका कारण विश्व शान्तिमा खतरा उत्पन्न भएको उल्लेख गर्दै पार्टीले युद्धको स्थिति उत्पन्न हुन नदिन र शान्ति कायम गर्नुपर्ने आवश्यकतामा जोड दिएको छ ।
यस्तो छ, प्रेसवक्तव्यको पूर्ण पाठ :
“रुसी र अमेरिकी साम्राज्यवादी देशहरूका बिचमा युक्रेनको प्रश्नलाई लिएर बढिरहेको तनावप्रति नेकपा (मसाल) को गम्भीर ध्यान आकर्षित भएको छ । त्यसबाट युद्धको स्थिति उत्पन्न हुने सम्भावना पनि देखा परिरहेको छ ।
वास्तवमा त्यहाँ अमेरिका र रुसका बिचमा जुन तनाव वा युद्धको स्थिति पनि देखा परेको छ, त्यसका पछाडि दुबै देशका साम्राज्यवादी स्वार्थले नै काम गरिरहेका छन् । अमेरिकाले युक्रेनलाई नाटो सैन्य सङ्गठनअन्तर्गत ल्याउन चाहन्छ भने रुसले युक्रेनका विभिन्न भागमा आफ्नो प्रभुत्व कायम गर्न चाहन्छ । त्यसरी ती दुबै देशका उद्देश्य साम्राज्यवादी स्वार्थद्वारा प्रेरित भएको कुरा प्रष्ट हुन्छ । त्यस प्रकारको पृष्ठभूमिमा हाम्रो पार्टीले युक्रेनबारे दुबै साम्राज्यवादी देशले अपनाएका नीतिको विरोध गर्दै युद्धको स्थितिलाई पैदा हुन नदिन र शान्ति कायम गर्नुपर्ने आवश्यकतामा जोड दिन्छ ।
आज युक्रेनमा जुन स्थिति उत्पन्न भएको छ, त्यो त्यहाँको मात्र समस्या नभएर विश्वभरिको नै समस्या हो । साम्राज्यवादी शक्तिहरूले आफ्ना साम्राज्यवादी उद्देश्य पूरा गर्नका लागि विभिन्न देशमा आफ्ना साम्राज्यवादी गतिविधि बढाएर लैजान्छन् वा युद्धसमेत गर्ने गर्दछन् । त्यसले गर्दाखेरि सम्पूर्ण विश्वको शान्तिमा नै गम्भीर खतरा उत्पन्न भएको छ । संसारका सम्पूर्ण साम्राज्यवाद विरोधी र शान्तिप्रेमी जनताको आन्दोलनद्वारा नै साम्राज्यवादीका त्यस प्रकारका गतिविधि वा युद्धको खतरालाई रोक्न तथा शान्तिको रक्षा गर्न पनि सकिन्छ ।
नेपालमा एम.सी.सी. को प्रश्न अत्यन्त गम्भीर बनेर गएको छ । अमेरिकाले एकातिर, खुल्ला प्रकारले धम्की दिएर र अर्कातिर, विभिन्न राजनीतिक पार्टीहरूमाथि दबाब बढाएर एम.सी.सी. को प्रस्तावलाई संसद्द्वारा पारित गराउनका लागि पूरा शक्ति लगाइरहेको छ । यो कुरा प्रष्ट छ कि एम.सी.सी. इन्डो–प्यासिफिक रणनीतिको अङ्ग हो, त्यसबाट नेपालको राष्ट्रियता, सार्वभौमिकता र असंलग्न परराष्ट्र नीति तथा बृहत्तर राष्ट्रिय हितमाथि नै गम्भीर आँच पुग्ने छ । वास्तवमा एम.सी.सी. सामान्य आर्थिक वा विकाससम्बन्धी सम्झौता मात्रै होइन, त्यो सम्झौताको माध्यमद्वारा अमेरिकाले नेपालमाथि कैयौँ प्रकारले नियन्त्रण गर्ने षड्यन्त्र गरेको छ र त्यसका गम्भीर प्रकारका दूरगामी परिणाम हुने छन् । त्यसैले हाम्रो पार्टीले सुरुदेखि नै त्यसलाई सम्पूर्ण रूपले खारेज गर्नुपर्ने माग गर्दै आएको छ र आफ्नो एकल पहलकदमीमा वा अन्य कतिपय वामपन्थी र लोकतान्त्रिक शक्तिहरूसँग मिलेर त्यसका विरुद्ध देशव्यापी रूपमा सङ्घर्ष गर्दै आएको छ ।
गत कालमा पाँचदलीय गठबन्धनले प्रतिगमनका विरुद्धको सङ्घर्षमा जुन महत्त्वपूर्ण उपलब्धि प्राप्त गरेको छ, नेपालको राजनीतिमा त्यसको कति धेरै योगदान रहेको छ ? त्यो कुरा बुझ्न गाह्रो पर्दैन तर अहिले एम.सी.सी. का कारणले त्यो गठबन्धन नै टुट्ने प्रकारका कैयौँ सङ्केत देखा पर्न थालेका छन् । त्यसो भयो भने त्यसबाट प्रतिगमनलाई नै मदत पुग्ने छ । त्यसको परिणामस्वरूप देश प्रतिगमनको दिशामा जाने मात्र होइन, देशमा फासिस्ट शासन कायम हुने समेतखतरा रहने छ । त्यसैले एम.सी.सी. जस्तो राष्ट्रघाती सम्झौतालाई संसद्द्वारा पारित गराउनको लागि पाँचदलीय गठबन्धनलाई भङ्ग गर्ने काम पनि अत्यन्त घातक हुने छ । त्यसरी हाम्रो पार्टीले एकातिर संसद्द्वारा एम.सी.सी. लाई पारित गराउने जस्ता सबै गतिविधि बन्द गर्न र अर्कातिर पाँचदलीय गठबन्धनलाई बचाउन पनि सम्बन्धित सबै पक्षको ध्यान आकर्षित गराउन चाहन्छ ।”
