बागलुङ । राष्ट्रिय जनमोर्चाका केन्द्रीय सदस्य एवम् जिल्ला समन्वय समिति बागलुङका अध्यक्ष राजेन्द्र ढुंगानाले एमसीसी अमेरिकाको लगानी भएको बताउनुभएको छ ।
शनिबार एमसीसीविरुद्ध बागलुङमा आयोजित विरोध सभालाई सम्बोधन गर्दै नेता ढुंगानाले एमसीसी लागू भए आफ्नो लगानी उठाउन अमेरिकाले जुनसुकै बेला हस्तक्षेप गर्न सक्ने बताउनुभयो ।
‘एमसीसी अनुदान नभएर लगानी हो । त्यसैले आफ्नो लगानी उठाउनको लागि अमेरिकी साम्राज्यवाद जुनसुकै समयमा पनि नेपालमाथी आफ्नो सैन्य शक्ति प्रयोग गर्न सक्ने छ। त्यसकारण यसलाई पुर्ण रुपमा खारेज गर्नुपर्छ’ उहाँले भन्नुभयो।
जिल्ला सदरमुकाम बागलुङमा सम्पन्न विरोध सभामा राष्ट्रिय जनमोर्चा, नेकपा (मसाल), विप्लब नेतृत्वको नेकपा, नेकपा क्रान्तिकारी माओवादी, देशभक्त जनतान्त्रिक मोर्चा लगायतका राजनैतिक दल र मोर्चाकानेता कार्यकर्ताको सहभागिता रहेको थियो । कार्यक्रममा जुलुसले बजार परिक्रमा गरी जिल्ला प्रशासन कार्यलयमा पुगेर विरोध सभामा परिणत भएको थियो ।
कार्यक्रममा बोल्दै विप्लब नेतृत्वको नेकपाका जिल्ला सदस्य महेन्द्र विकले एमसीसीले देशमा एउटा विद्रोहको स्थिती सृजना गर्ने हुनाले यसलाई खारेज गर्नुपर्नेमा जोड दिनुभयो ।
त्यस्तै, नेकपा क्रान्तिकारी माओवादीका पूर्ण बहादुर गुरुङले यदि नेपाली जनताको विरुद्ध अहित हुने यो सम्झौता लागू गरे उक्त पार्टी र पार्टिका नेतालाई बागलुङ बासी जनताले गाउँ छिर्न समेत नदिने चेतावनी दिनुभएको थियो ।
अन्त्यमा नेकपा (मसाल) बागलुङका प्रवक्ता मेक बहादुर पाइजाले देशभन्दा गठबन्धन कुनैपनि हालतमा ठूलो हुन सक्दैन भन्दै यसलाई यो वा त्यो बहानामा पास गर्ने योजना नगराइयोस् भन्नुभयो । अन्यथा नेपाली जनता सशक्त प्रतिकारमा उत्रिने उहाँले चेतावनी दिनुभयो । कार्यक्रमको सन्चालन अखिल नेपाल युवक संघका महासचिव भिमसेन वनले गर्नुभएको थियो ।
