दिनेश रैदास, दाङ ।
विवादित अमेरिकी सहायता परियोजना मिलेनियम च्यालेन्ज कर्पोरेसन (एमसीसी) विरुद्ध दाङका घोराहीमा मसाल जुलुस प्रदर्शन गरिएको छ।
नेकपा (मसाल), नेपाल कम्युनिस्ट पार्टी, नेपाल कम्युनिस्ट पार्टी (क्रान्तिकारी माओवादी), राष्ट्रिय जनमोर्चा र नेकपा (माले) को संयुक्त आयोजनामा मसाल जुलुस तथा विरोध सभा गरिएको हो ।
विरोध सभालाई सम्बोधन गर्दै राजमो लुम्विनी प्रदेश सल्लाहकार शुरेस थापाले राष्ट्रघाती सम्झौता एमसीसी कुनै पनि हालतमा पास गर्न नहुने र नागरिकका भावनामाथि कुल्चेर एमसीसी पास गरे जनता चुप लागेर नबस्ने बताउनु भयो।
‘एमसीसी यदि सहयोग हो भने संसदबाट किन पास गर्नु पर्यो?’ उहाँले प्रश्न गर्नुभयो, ‘एमसीसी सम्झौतामा लेखिएको अमेरिकी नियम कानुन नेपालले मान्नुपर्ने आपत्तिजनक प्रावधान राखिएको छ । नेपाली सार्वभौमिकताविरुद्धको एमसीसी खारेज गर्नुपर्छ ।’
थापाले एमसीसी विरुद्धका अगामी कार्यक्रमहरुमा आमजनतालाई उपस्थितिको लागि समेत आग्रह गर्नु भयो।
त्यसैगरी नेकपा (माले) का कपिल पोख्रेल, नेकपा ( क्रान्तिकारी माओवादी) का तिलक विक र नेकपाका निर्मल लगायतले मन्तब्य राख्नु भएको थियो । सभाको सहजीकरण अमर खड्काले गर्नु भएको थियो ।
