काठमाडौँ । नेकपा (मसाल) ले प्युठान मल्लरानी घटनामा माफी माग्न नेकपा (विप्लव) समूहसित आग्रह गरेको छ । फागुन ९ गते राष्ट्रिय जनमोर्चाको तर्फबाट मल्लरानीमा निर्वाचित गाउँपालिका अध्यक्ष अमरध्वज रानासहितलाई कालो मोसो दलिएपछि पार्टीले विप्लव समूहसित यस्तो आग्रह गरेको हो ।
प्रवक्ता रामप्रकाश पुरीको हस्ताक्षरमा २०७८ फागुन १० गते जारी गरिएको प्रेसविज्ञप्तिमा एकातिर, एम.सी.सी. को विरुद्धमा सहकार्य अत्यन्तै आवश्यक रहेको र अर्कातिर, वामपन्थी शक्तिमाझको कार्यगत एकतालाई कमजोर पार्न नेकपा (एमाले) ले प्रयास गरिरहेको सन्दर्भमा विप्लव पक्षसित त्यस सम्बन्धमा गम्भीर हुन माग गरिएको छ ।
मल्लरानी प्रकरणमा पाँच बुँदे निर्णयसमेत सार्वजनिक गरिएको सो प्रेसवक्तव्यको पूर्ण पाठ यस्तो छ–
“प्युठान मल्लरानी गाउँपालिकाका अध्यक्ष का. अमरध्वज रानालाई नेकपा (विप्लव) पक्षका कार्यकर्ताहरूले फागुन ९ गते कालोमोसो दलेको घटनालाई नेकपा (मसाल) ले गम्भीर रूपमा लिएको छ ।
नेकपा (विप्लव) पक्षलाई हाम्रो पार्टीले मित्रशक्तिको रूपमा लिएको छ र एम.सी.सी. का विरुद्ध उनीहरूसित राष्ट्रिय स्तरमा नै सहकार्य भइरहेको छ । हिजो मल्लरानी गाउँपालिकाअन्तर्गतको सरङकोटमा एउटा विद्यालयमा स्कुलसित सम्बन्धित कुनै विषयमा छलफलका लागि गएको बेलामा विप्लव पक्षका केही कार्यकर्ताहरूले अकस्मात आएर अमरध्वजसमेत त्यो गाउँपालिकाका अन्य कतिपय अधीकृत र कर्मचारीसमेतलाई कालोमोसो दलेर फरार भएका थिए । अमरध्वज राना अखिल नेपाल जनजाति सम्मेलनका केन्द्रीय महासचिव पनि हुनुहुन्छ ।
सरङकोटमा अमरध्वज रानासमेत माथि जुन कारबाही भयो, त्यो वडाको अध्यक्ष एमालेका कार्यकर्ता नै हुन् तर त्यो दिनको बैठकमा उनी त्यहाँ आएका थिएनन् । त्यसबाट यो अनुमान गर्न सकिन्छ कि एमालेसमेत सित मिलोमतो गरेर सुनियोजित प्रकारले नै त्यस प्रकारको घटना घटाइएको थियो । त्यो पालिकामा राष्ट्रिय जनमोर्चाले नै जितेको हुनाले छिट्टै हुन थालिरहेको स्थानीय चुनावमा राजमोलाई कमजोर पार्न एमालेसित साँठगाँठ गरेर त्यो घटना घटाइएको थियो भन्नका लागि शङ्का गर्ने ठाँउ छ ।
प्युठानमा विप्लव पक्षका कार्यकर्ताहरूले पहिले झिमरुक र मल्लरानी गाउँपालिकामा चन्दा मागेर कैयौँ धम्की पनि दिँदै आएका थिए तर त्यहाँ त्यस प्रकारका धम्कीले काम नगरेपछि अहिले उनीहरू प्रत्यक्ष कारबाहीमा अगाडि आएको कुरा पनि प्रष्ट छ ।
देशमा एम.सी.सी.का विरुद्ध विप्लव पक्षसित समेत मिलेर राजमोले संयुक्त आन्दोलन चलाइरहेको बेलामा स्थानीय स्तरमा गरिएको त्यो कारबाही अत्यन्त दुःख र क्षोभको कुरा हो र त्यसबाट प्रतिगमनलाई नै मदत पुग्ने कुरा प्रष्ट छ ।
मल्लरानीको त्यो घटनामाथि विचार गर्नका लागि नेकपा (मसाल) को केन्द्रीय कार्यालयको भर्चुअल बैठक आजै बसेको थियो । त्यो बैठकले सर्वप्रथम सरङकोटमा गरिएको त्यस प्रकारको कारबाहीको तीव्र शब्दमा निन्दा र भत्र्सना गर्दै त्यसबारे तल लेखिएअनुसारका निर्णयहरू गरेको छ :
१) त्यस प्रकारका सत्रुतापूर्ण कारबाही बन्द गर्नका लागि चेतावनी दिने ।
२) त्यो घटनाका लागि जिम्मेवार कार्यकर्तामाथि कारबाही गर्ने र सार्वजनिक रूपले माफी माग्न लगाउने वा उनीहरूले माफी नमागेमा केन्द्रले नै त्यसका लागि माफी माग्ने ।
३) प्युठानमा उनीहरूसितको कार्यगत एकता बन्द गर्ने र त्यहाँ उनीहरूका विरुद्ध भण्डाफोर कार्यक्रम सञ्चालन गर्ने ।
४) सरङकोटको घटनामा संलग्न कार्यकर्तामाथि कारबाही नगरेमा वा सार्वजनिक रूपमा माफी माग्ने कामसमेत नगरेमा विप्लव पक्षसितको कार्यगत एकता वा सहकार्यको नीतिबारे पनि पुनर्विचार गर्ने ।
५) त्यस प्रकारको दुव्र्यवहारका लागि आवश्यक कानुनी कारबाही अगाडि बढाउने ।
हामीले विप्लव पक्षसित कैयौँ गम्भीर प्रकारका सैद्धान्तिक र राजनीतिक मतभेद भए पनि त्यसलाई एउटा वामपन्थी र मित्रशक्ति मान्दै आएका छौँ । देशका कतिपय राजनीतिक प्रश्नमा लामो समयदेखि त्योसित मिलेर संयुक्त आन्दोलन पनि गर्दै आएका छौँ । त्यसरी त्योसितको कार्यगत एकता वा सहकार्यलाई हामीले गम्भीर अर्थ र महत्त्व दिने गरेका छौँ । तर बिच बिचमा उनीहरूले अपनाउने त्यस प्रकारका सत्रुतापूर्ण कारबाहीबाट हाम्रो एकतामा बारम्बार बाधा पुग्ने गरेको छ र अहिले पुनः त्यस प्रकारको कारबाहीको पुनरावृत्ति भएको छ । तैपनि त्यो कारणले एम.सी.सी. का विरुद्ध भइरहेको संयुक्त आन्दोलनमा बाधा पुग्न नदिने हाम्रो प्रयत्न हुने छ । अहिले प्युठानमा भएको घटनाबारे सही दृष्टिकोण अपनाएर वामपन्थी शक्तिहरूका बिचको कार्यगत एकता र सहकार्यलाई निरन्तरता दिन उनीहरूले सकारात्मक भूमिका खेल्नेछन् भन्ने हामीले आशा गरेका छौँ ।
एमालेले वामपन्थीहरूका बिचको कार्यगत एकता वा सहकार्यलाई तोड्न विभिन्न प्रकारले षड्यन्त्र गरिरहेको कुराको सजिलैसँग अनुमान गर्न सकिन्छ । प्युठानको घटनालाई पनि वामपन्थी शक्तिबिचको एकतालाई कमजोर पार्न प्रत्यक्ष वा अप्रत्यक्ष रूपले उनीहरूले (एमालेले) उपयोग गर्न सक्ने सम्भावनालाई अस्वीकार गर्न सकिन्न । एउटा वामपन्थी शक्तिको हैसियतले नेकपा (विप्लव) पक्षले पनि त्यसप्रति ध्यान दिने छ र वामपन्थी शक्तिका बिचको कार्यगत एकता वा सहकार्यलाई सुदृढ पार्न सधैँ प्रयत्न गरिरहने छ भन्ने हामीले आशा गरेका छौँ ।”
