काठमाडौं । राष्ट्रिय प्रजातन्त्र पार्टीका पूर्वअध्यक्ष कमल थापाले नेकपा (एमाले) सँग सहकार्य हुनसक्ने बताउनुभएको छ । राप्रपा परित्याग गरी नयाँ पार्टी निर्माण गर्न लागेका थापाले एमालेसँग सहकार्य गर्ने जानकारी दिनुभएको हो ।
एक टेलिभिजनलाई अन्तर्वार्ता दिँदै थापाले भन्नुभएको छ, ‘केपी ओली र एमालेसँग कुनै न कुनै विन्दुमा सहकार्य हुन सक्छ ।’
एमाले अध्यक्ष ओलीले पशुपतिमा सुनको जलहरी चढाएर तथा चितवनमा नयाँ राम मन्दिर बनाएर आफू हिन्दुवादी बनेको संकेत गरिरहँदा हिन्दुवादी पार्टी गठनका तयारीमा रहेका थापाले ओलीसँगको सहकार्यबारे खुलासा गर्नुभएको हो ।
थापाले राजसंस्था र राप्रपासँग डिभोर्स गरी हिन्दुराष्ट्र, सुशासन र समृद्धिलाई आधार बनाएर निकट भविष्यमा नयाँ पार्टी गठन गर्न लागेको पनि स्पष्ट पार्नुभएको छ ।
‘म अब राजाविहीन प्रजातन्त्रको पक्षमा हुन्छु । राजसंस्था पुनःस्थापनाको कार्यनीति लिएर सडकमा जान्नँँ’ थापाले भन्नुभएको छ, ‘राप्रपा र राजसंस्थासँग मेरो डिभोर्स भैसक्यो । अब तीतो कुरा गर्न चाहन्नँ ।’
नेपालमा हिन्दु राष्ट्र र राजसंस्थासहितको प्रजातन्त्र धेरै मिहिनेत गरेपनि पूर्वराजा ज्ञानेन्द्र शाहले आफूलाई धोका दिएको थापाको आरोप छ ।
गएको मंसिरमा भएको राप्रपाको एकता महाधिवेशनमा राजेन्द्र लिङ्देनसँग अध्यक्षमा हारेका थापाले निर्मल निवासको हस्तक्षेपका कारण आफूले हार ब्यहोर्नुपरेको बताउँदै आउनुभएको छ ।
