जनकपुर । जनकपुरमा ७ महिने बच्चा चोरी गर्ने तीन जना पक्राउ परेका छन् । पक्राउ पर्नेमा दुई महिला र एक जना पुरुष रहेका छन् ।
धनुषाको गणेशमान चारनाथ नगरपालिका–१० की ३५ वर्षीया मनिषा देवी मुखिया, औरही गाउँपालिका–१ पौडेश्वर घर भई हाल जनकपुरधाम उपमहानगरपालिका–८ बस्ने २० वर्षीया किरण राम र महोत्तरीको लोहारपट्टी नगरपालिका–४ घर भई जनकपुरधाम उपमहानगरपालिका–७ बस्ने २२ वर्षीय कृष्ण कुमार यादवलाई ७ महिनाको बच्चा चोरीको आरोपमा धनुषा प्रहरीले पक्राउ गरी बिहीबार सार्वजनिक गरेको हो ।
बुधबार साँझ करिब ६ बजे जनकपुरधाम–६ स्थित महाराज सागर पोखरी छेउबाट मोहम्द अमिर राइनका ७ महिने शिशु अख्तर राइनलाई मनिषाले लिएर भागेकी थिइन् । आफ्नो छोरा नभएकाले उनले सो बच्चा चोरी गरेको प्रहरीको प्रारम्भिक अनुसन्धानबाट खुलेको छ ।
मोहमद आमिर राइनकी ६ वर्षीया छोरी एलिजा खातुन भाइसँग खेलिरहेको समय आएकी मनिषाले एलिजालाई ५० रुपैयाँ दिएर कुरकुरे किन्न पठाई बच्चालाई लिएर भागेकी थिइन् ।
बच्चा लिएर भाग्दै गरेकी मनिषालाई प्रहरीले खोजतलास गर्ने क्रममा बिहीबार बिहान साढे ८ बजे जनकपुरधाम–१९ बेंगा शिवपुर पिपराढी स्थित खेतबाट पक्राउ गरेको हो ।
प्रहरीका अनुसार घटनाको समयमा मनिषासँगै रहेको आफ्नो बच्चा भनिएकी २ वर्षीय नन्दनी मुखियालाई अर्को पक्राउ परेकी महिला किरण रामसँगै पठाएर ७ महिने शिशुलाई लिएर भागेकी थिइन् । यस्तै, कृष्ण कुमारले मनिषासँग १३ हजार रुपैयाँ लिएर बच्चा उपलब्ध गराउने वाचा गरेका थिए ।
पक्राउ परेकाहरुमाथि अपहरण सम्बन्धी मुद्दा दर्ता गरी आवश्यक अनुसन्धान सुरु गरिरहेको जिल्ला प्रहरी कार्यालय धनुषाले जनाएको छ।
