काठमाडौं । नेपालको जनसंख्या २ करोड ९१ लाख ९२ हजार ४८० पुगेको छ । तथ्यांक विभागले बुधबार सार्वजनिक गरेको प्रारम्भिक तथ्यांक अनुसार उक्त जनसंख्या देखिएको हो।
प्रारम्भिक नतिजाका अनुसार देशभरि महिलाको संख्या १ करोड ४९ लाख १ हजार १६९ रहेको छ भने पुरुषको संख्या १ करोड ४२ लाख ९१ हजार ३११ रहेको छ।पुरुषभन्दा महिलाको संख्या ६ लाख ९,८५८ जनाले मात्रै बढी छ । नतिजामा ‘अन्य लिङ्गी’हरू समेटिएका छैनन् ।
गएको कात्तिक २५ गतेदेखि गरिएको राष्ट्रिय जनगणनाको प्रारम्भिक तथ्यांक विभागले आज सार्वजनिक गरेको हो ।यसअघि २०६८ मा गरिएको गणना अनुसार नेपालको जनसंख्या २ करोड ६४ लाख ९४ हजार ५०४ रहेको थियो ।
सार्वजनिक तथ्यांक अनुसार प्रदेश १ मा ४९ लाख ७२ हजार ०२१, मधेश प्रदेशमा ६१ लाख २६ हजार २८८, बागमतीमा ६० लाख ८४ हजार ०४२, गण्डकीमा २४ लाख ७९ हजार ७४५, लुम्बिनीमा ५१ लाख २४ हजार २२५, कर्णालीमा १६ लाख ९४ हजार ८८९ र सुदूरपश्चिममा २७ लाख ११ हजार २७० जनसंख्या रहेको छ।
यस्तै, हिमाली क्षेत्रको जनसंख्या १७ लाख ६८ हजार १०८ (६.९ प्रतिशत), पहाडमा १ करोड १७ लाख ४८ हजार ४४८ (४०.२५ प्रतिशत) र तराईमा १ करोड ५६ लाख ६५ हजार ८२८ (५३.६६ प्रतिशत) रहेको छ।
तथ्यांकअनुसार विदेशमा रहेका नेपालीको संख्या २१ लाख ६९ हजार ४७८ रहेको छ।
६ महिनाभित्र जनगणनाको अन्तिम नतिजा प्रकाशन गर्ने योजना रहे पनि कोरोनाभाइरस महामारीका कारण केही प्रक्रिया ढिला हुने विभागका उपमहानिर्देशक हेमराज रेग्मीले जानकारी दिनुभयो ।
