काठमाडौं । राष्ट्रिय जनमोर्चाले भैतिक पूर्वाधार तथा यातायातमन्त्री रेणु यादवको अभिव्यक्तिप्रति आपत्ति जनाएको छ ।
अध्यक्ष चित्रबहादुर केसीले शनिबार एक वक्तव्य प्रकाशित गरी मन्त्री यादवको अभिव्यक्तिको भर्त्सना गर्नुभएको छ ।
‘भौतिक पूर्वाधार तथा यातायात मन्त्री रेणु यादवले सिके राउतको हत्या गर्ने सम्बन्धी दिएको अभिव्यक्तिप्रति राष्ट्रिय जनमोर्चाको ध्यान आकर्षण भएको छ । राष्ट्रिय जनमोर्चाले व्यक्ति हत्याको राजनीतिलाई सही मान्दैन । सरकारको जिम्मेवार मन्त्रीले त्यसप्रकारको अभिव्यक्ति दिनु सही होइन । हामीले मन्त्री यादवको त्यसप्रकारको अभिव्यक्तिको विरोध र भत्र्सना गर्दछौँ’ केसीद्वारा जारी वक्तव्यमा भनिएको छ ।
मन्त्री यादवले माघ ५ गते रौतहटको गौरमा आयोजित एक सभामा २०६३ सालको गौर नरसंहार सम्झाउँदै जनमत पार्टीका अध्यक्ष सिके राउतको हत्या गर्ने धम्की दिएकी थिइन् । मन्त्री यादवको सो हिंसात्मक अभिव्यक्तिप्रति चौतर्फी विरोध भइरहेको छ । राउत नेतृत्वको जनमत पार्टीले त मन्त्री यादवलाई तत्काल बर्खास्त गरी पक्राउ गर्न माग गरेको छ ।
- सिके राउत भन्छन् : रेणु यादवले गौर हत्याकाण्ड स्वीकारिन्, तुरुन्त पक्राउ गर
- गौर नरसंहार सम्झाउँदै मन्त्रीले नै दिइन् सिके राउतको हत्या गर्ने धम्की
