काठमाडौं । डा. सिके राउत नेतृत्वको जनमत पार्टीले भौतिक पूर्वाधार तथा यातायातमन्त्री रेणुकुमारी यादवलाई पक्राउ गर्न माग गरेको छ ।
बिहीबार विज्ञप्ति प्रकाशित गरी जनमत पार्टीले मन्त्री यादवलाई तत्काल बर्खास्त गरी पक्राउ गर्न माग गरेको हो ।
मन्त्री यादवले गौर हत्याकाण्ड स्वीकारेको भन्दै उनलाई पक्राउ गर्न जनमत पार्टीले माग गरेको छ । देशकै संघीय मन्त्री जस्तो जिम्मेवार पदमा रहेको व्यक्तिबाट आएको सो अभिव्यक्ति चरम आपराधिक भएको जनमतको ठहर छ ।
‘२०६३ साल चैत्र ७ गते भएको गौर नरसंहार, जसमा कम्तीमा २८ जनाको पाशविक तरीकाले हत्या भएको थियो, जनता समाजवादी पार्टी (तत्कालीन मधेशी जनाधिकार फोरम) ले नै घटाएको मन्त्रीज्यूले सगर्व घोषणा गरिसके पछि यो गौर नरसंहारको स्वीकारोक्ति पनि हो’ विज्ञप्तिमा भनिएको छ, ‘तसर्थ नेपाल सरकारले आपराधिक अभिव्यक्ति दिने, हत्या(हिंसा भड्काउन खोज्ने र अर्को नरसंहारको षड्यन्त्र रच्ने सो मन्त्रीलाई अविलम्ब बरखास्त गर्नु पर्दछ।’
साथै, सो पार्टीले ‘गौर नरसंहारका फरार अभियुक्तहरूलाई सुरक्षाकर्मीहरूले विशिष्ठ सुरक्षा घेरामा राखेर सुरक्षा दिने नभई उनीहरूलाई तत्काल पक्राऊ गरी नरसंहार पीडितहरूलाई न्याय दिँदै मधेशमा विद्यमान आपराधिक पार्टीको आपराधिक राजलाई समाप्त पार्नुपर्ने’ जनाएको छ।
मन्त्री यादवले हिजो रौतहटकको गौरमा आयोजित एक कार्यक्रममा १५ वर्षअघिको गौर हत्याकाण्ड सम्झाउँदै सिके राउतलाई मारिदिने धम्की दिएकी थिइन् । गौर काण्डमा तत्कालिन मधेशी जनअधिकार फोरमका कार्यकर्ताले माओवादीका २७ जना कार्यकर्ताको हत्या गरेका थिए । त्यतिबेला मन्त्री यादव उपेन्द्र यादव नेतृत्वको फोरममै थिइन् ।
