काठमाडौं । नेपाल पत्रकार महासंघका १७ जना केन्द्रीय सदस्यहरुले केन्द्रीय समितिको बैठक बहिस्कार गरेका छन् ।
कपिलवस्तुको तिलौराकोटमा आयोजना गरिएको बैठकमा अध्यक्ष विपुल पोखरलेको नैतिकतामाथि प्रश्न उठाउँदै १७ जना केन्द्रीय सदस्यहरुले बैठक बहिस्कार गरेका हुन् ।
केन्द्रीय सदस्यहरु बैठक कक्षबाट बाहिरिएपछि केन्द्रीय समितिको बैठक औपचारिक रुपमा सुरु हुन सकेको छैन । सहमतिको प्रयास भइरहेको बताइएको छ ।
केन्द्रीय सदस्यहरुले केही दिन अघि ‘ड्रिम हाइ नेपाल’ इभेन्ट म्यानेजमेन्ट कम्पनीले होटल सोल्टीमा गरेको मिडिया अवार्ड कार्यक्रममा महासंघ अध्यक्ष विपुल पोखरेल सहभागी भएकोप्रति आपत्ति जनाएका हुन् ।
मिडिया अवार्डका नाममा चलाइएको ठगी धन्दामा महासंघ अध्यक्ष पोखरेल पनि संलग्न भएको आरोप बहिष्कार गर्नेहरुले आरोप लगाएका छन्।
केन्द्रीय सदस्यहरुले ‘मिडिया अवार्ड प्रकरण’ले महासंघको गरिमामाथि नै प्रश्न उठाएको भन्दै छानबिनको माग गरेका छन् । सो विषय छानबिन नभएसम्म पोखरेलको अध्यक्षतामा बैठक नबस्ने उनीहरुको अडान छ ।
अध्यक्ष पोखरेल त्यो अवार्डमा महासंघको नाम प्रयोग गर्नका लागि ३ लाख रुपैयाँको सम्झौता गरेका थिए। तर त्यतिबेलै महासचिव रोशन पुरीसहितले आपत्ति जनाएका थिए।
