खिमबहादुर विक, प्युठान ।
नेकपा (माओवादी केन्द्र) प्युठानका नेताद्वय पितबहादुर केसी र यामबहादुर महतरा राष्ट्रिय जनमोर्चामा प्रवेश गर्नुभएको छ ।
राष्ट्रिय जनमोर्चा झिमरुक गाउँपालिका–३ को आहालखोला डाँडाँडिहीमा बुधबार आयोजित कार्यक्रममा उहाँहरु राजमोमा प्रवेश गरेको घोषणा गर्नुभएको हो ।
कार्यक्रममा अखिल नेपाल किसान महासंघका केन्द्रीय उपाध्यक्ष चन्द्रबहादुर केसी र राजमो लुम्बिनी प्रदेश सदस्य एवम् झिमरुक गाउँपालिकाका अध्यक्ष तिलकबहादुर जिसीले अविर लगाएर स्वागत गर्नुभएको थियो । नेताद्वयले माओवादी केन्द्रले क्रान्तिकारी चरित्र छोडेर संसदीय भासमा डुबेको भन्दै देश र जनताको पक्षमा दृढतापूर्वक संघर्षरत राष्ट्रिय जनमोर्चा रोजेको बताउनुभयो ।
कार्यक्रममा किसन महासंघका केन्द्रीय उपाध्यक्ष केसीले राष्ट्रिय जनमोर्चा र नेकपा (मसाल) नै जनता र राष्ट्रियताको असली पहरेदार रहेको बताउनुभयो । उहाँले मसालको अविचलित राष्ट्रियता र जनजीविकाको पक्षमा उठाउने आवाज, नीति र आन्दोलनदेखि तर्सिएर कतिपयले मसाललाई सखाप पार्छौं भन्दै हिँडे पनि त्यो दिवास्वप्न मात्र भएको बताउनुभयो ।
कार्यक्रममा झिमरुक गाउँपालिकाका अध्यक्ष तिलकबहादुर जिसीले झिमरुक गाउँपालिका अहिले विकासको नाममा प्रदेशकै नमुनाको रुपमा परिचित भएको जनप्रतिनिधिको मात्र भूमिकाले नभएर पार्टीको सहि नीतिबाट सम्भव भएको बताउनु भयो ।
कार्यक्रम राजमोका पूर्वजिल्ला उपाध्यक्ष रणबहादुर खड्का, अखिल नेपाल किसान महासंघका जिल्ला अध्यक्ष तथा ३ नम्वर वडाका अध्यक्ष मीनबहादुर खत्री, मूल प्रवाह अखिल भारत नेपाली एकता समाजका केन्द्रीय सदस्य खिमबहादुर विक, जातीय समता समाज लुम्बिनी प्रदेशका सदस्य एवम् प्युठान जिल्ला कोषाध्यक्ष विनोद कुमार विक, अखिल (छैठौं) का केन्द्रीय सदस्य एवम् प्युठान जिल्ला अध्यक्ष नवीन केसी, अखिल नेपाल युवक संघ झिमरुकका उपाध्यक्ष अर्जुन केसी, अखिल नेपाल महिला संघकी –३ नम्बर अध्यक्ष मन्जु महतरा र वरिष्ठ किसान नेता डण्डबहादुर केसीको पनि आतिथ्यता रहेको थियो ।
झिमरुक –३ का सचिव नवराज केसीको सञ्चालन, उपाध्यक्ष रेकम एमसीको अध्यक्षता तथा राजमो गाउँपालिकाका सचिव केशरजंग एमसीको स्वागत मन्तब्यमा कार्यक्रम सम्पन्न भएको थियो ।
