जनकराज पौडेल ##

उसले भन्छ मलाई
तिमी भुलभुलैयामा छौ
मैले भन्छु उसलाई
म आफ्नो बाटोमा दृढ छु
म घमण्ड गर्दछु
साँच्चै घमण्ड गर्दछु र ?
ऊ नै भुलभुलैया छ
म सच्चाइको बाटोमा छु
किनकि
मैले विगत अध्ययन गरेको छु
वर्तमानमा उसका चुरीफुरी देखेको छु
तर ऊ स्विकार्दैन
आफैलाई सच्चाइ ठान्दछ
तर म अझै पनि पर्खिरहने छु
मेरो घमण्डलाई समयले
गलत साबित गरोस्
म दृढ विश्वस्त छु
समयको प्रतिक्षाले
मलाई मूर्ख बनाउने छ
किनकि उसले
समयको रफ्तार बुझेको छैन
परिस्थिति सापेक्षतामा
विश्लेषण गर्न सकेको छैन
उ mधेरै सङ्कीर्ण बनेको छ
जस्तै सूर्य पूर्वबाट उदाउँछ
पश्चिमबाट अस्ताउँछ
तर
वस्तुगत परिस्थिति त्यस्तो हुँदैन
सापेक्षताका उपज
परिवर्तन भइरहन्छन्
त्यसैले मेरो दाबी छ
म होइन, ऊ नै भुलभुलैयामा छ

अभियान उसले छोडेको छ
बाटो उसले नै मोडेको छ
अभियान छोड्ने र बाटो मोड्ने
तर कुरा मिठा र चाँखिला गर्ने
आजकल नौलो लाग्दैन मलाई
मलाई थाहा छ
मेरो बाटो अप्ठ्यारो छ
हजारौँ घुम्ती मोड पार गर्नुछ
लाखौँ अवरोध तोड्नुपर्ने छ
तर मलाई विश्वास छ
यही बाटो सत्य छ
मैले भेट्न नसके पनि
मेरो सन्ततिका लागि
यही बाटोमा सुन्दर भविष्य छ
त्यसैले मलाई
आत्मविश्वास छ
यही बाटो गौरव छ
म होइन, ऊ भुलभुलैयामा छ
सुन्दर युग भेट्ने हाम्रो अभियान छ
अवश्य भेटिन्छ
यही विश्वासमा मेरो छ
म होइन, ऊ नै भुलभुलैयामा छ ।