काठमाडौं । नेकपा (माओवादी) केन्द्रले अब शान्तिपूर्ण संघर्षबाटै समाजवादतिर जान सकिने विश्वास गरेको छ । काठमाडौंमा जारी पार्टीको आठौं महाधिवेशनमा राजनीतिक प्रतिवेदन पेश गर्दै अध्यक्ष पुष्पकमल दाहाल प्रचण्डले पूँजीवादी जनवादी क्रान्ति सम्पन्न भइसकेको जिकीर गर्नुभएको छ ।
‘२१औँ शताब्दीमा समाजवादको नेपाली बाटो’ शीर्षकमा प्रचण्डले पेश गरेको ४५ पेज लामो प्रतिवेदनमा समाजवाद प्राप्तिको बाटो र प्रक्रिया आफ्नै खालको हुने विषय वस्तुलाई विशेष जोड दिइएको छ ।
‘नेपाली मौलिकतासहित पूँजीवादी जनवादी क्रान्ति सम्पन्न भयो। सङ्घीय लोकतान्त्रिक गणतन्त्र नेपाली विशेषतामा आधारित प्रणाली हो। हामीले स्थापना गर्ने भनेको समाजवाद पनि नेपाली मौलिकताको नै हुनेछ’ प्रचण्डको प्रतिवेदनमा उल्लेख छ ।
माओवादीले क्रान्तिका कुरा गरेपनि व्यवहारमा प्रतिक्रान्तिको सेवा भइरहेको स्वीकार गरेको छ । अध्यक्ष प्रचण्डले कुरा र व्यवहारबीच भयंकर विरोधाभास रहेको औँल्याउनुभएको छ ।
वर्तमान कम्युनिष्ट आन्दोलन ‘कुरा क्रान्तिको व्यवहार प्रतिक्रान्तिको गर्ने भयानक विरोधाभासको शिकार बन्दै जान थालेको’ प्रतिवेदनमा उल्लेख छ ।
कम्युनिष्ट आन्दोलनलाई सिद्धान्त र व्यवहारबीचको एकरूपताको आन्दोलनमा कहाँबाट र कसरी रुपान्तरण गर्ने ? भन्ने प्रश्न गर्दै प्रचण्डले भन्नुभएको छ, ‘समाजवादी क्रान्तिको विचारधारात्मक र राजनीतिक कार्यदिशा स्पष्ट भइसकेपछि संगठन संघर्ष र आचरणको प्रश्न मुख्य भएर आउँछ ।’
यस्तो छ पूर्णपाठ :
