काठमाडौं । नेपाली कांग्रेसको चौधौँ महाधिवेशन अन्तर्गत महिला खुला केन्द्रीय सदस्यको निर्वाचन परिणाम सार्वजनिक भएको छ ।
सोमबार साँझ सार्वजनिक भएको परिणाम अनुसार प्रधानमन्त्री शेरबहादुर देउवा पत्नी डा. आरजु राणासहित नौ जना निर्वाचित भएका छन् ।
नौ जना निर्वाचित हुने महिला खुला केन्द्रीय सदस्यतर्फ सर्वाधिक मत डिला संग्रौलाले ल्याउनुभएको छ । कूल ४६७९ मतमा संग्रौलाले २८८५ मत पाउनुभएको हो ।
यस्तै, पुष्पा भुसाल २७१८, डा आरजु राणा २५३६, अम्बिका बस्नेत २३३९, इश्वरी न्यौपाने २२५९, सरिता प्रसाई २०९६, रमा कोइराला पौडेल १८५८, शुसीला ढकाल आचार्य १८०४ र रंगमती शाही १७८९ मतसहित विजयी हुनुभएको छ ।
यसअघि नै कांग्रेस सभापतिमा शेरबहादुर देउवा, दुई उपसभापतिमा पूर्णबहादुर खड्का र धनराज गुरुङ, दुई महामन्त्रीमा गगन थापा र विश्वप्रकाश शर्मा, ८ सहमहामन्त्रीमा महालक्ष्मी उपाध्याय, जीवन परियार, भीष्मराज आङ्देम्बे, फर्मुल्लाह मन्सुर, किशोरसिंह राठौर, महेन्द्र यादव, उमाकान्त चौधरी र बद्री पाण्डे चुनिएका छन् ।
