वीरेन्द्रनगर । सुर्खेतमा सिम्ताली भाषिकाको शब्दकोश निर्माण गरिने भएको छ । सिम्ताली एकता समाजको आयोजनामा सिम्ताली शब्दकोश निर्माण गर्न थालेको हो ।
यसै सन्दर्भमा सिम्ता गाउँपालिकाको सहयोगमा सोही पालिकाको सभाकक्षमा २०७८ पुुस २ र ३ गते “भाषिका सिद्धान्त, नेपाली भाषाका भाषिक भेदहरू र सिम्ताली–नेपाली शब्दकोश निर्माण“ सङ्गोष्ठी निर्माण भएको छ ।
सङ्गोष्ठीमा बोल्दै प्रमुख अतिथि प्रा.डा. जीवेन्द्र देव गिरीले भाषिकाबारे महत्त्वपूर्ण छलफल हुनु र सिम्ताली–नेपाली शब्दकोश छिट्टै प्रकाशित हुने वातावरण बन्नु हर्षको कुरा भएको बताउनुभयो ।
विशिष्ट अतिथि सिम्ता गाउँपालिकाका अध्यक्ष कविन्द्र केसीले भाषासाहित्य र संस्कृतिको विकासका निम्ति हरेक वर्ष गाउँपालिकाले बजेट छुट्याउने गरेको जानकारी गराउँदै सिम्ताली नेपाली पाठ्यक्रमका साथै सिम्ताली–नेपाली शब्दकोश, यस भाषिकाको व्याकरण र सिम्ताली लोकगीतसम्बन्धी पुस्तक गाउँपालिकाले प्रकाशन गर्ने प्रतिबद्धता व्यक्त गर्नुभयो ।
सङ्गोष्ठीमा प्रा.डा. जीवेन्द्र देव गिरीले “सिम्ताली–नेपाली शब्दकोश निर्माण”, डा. हर्कबहादुर शाहीले “नेपाली भाषाका भाषिक भेदहरू” र रमेश खत्रीले “भाषिका सिद्धान्त” विषयमा कार्यपत्र प्रस्तुत गर्नुभएको थियो ।
उक्त कार्यपत्रहरूमाथि क्रमशः डा. दीपक गौतम, बलभद्र भारती र रेशम विष्टले टिप्पणी गर्नुभएको थियो ।
शब्दकोशमा सुझावका निम्ति गठित विभिन्न समूहका तर्फबाट रुद्र केसी, भूपालसिंह ठकुरी र मानबहादुर शाहीले केही सुझाव दिँदै आफूहरूले पछि पनि यसको शब्दसङ्ख्या बढाउन आवश्यक सहयोग गर्ने प्रतिबद्धता व्यक्त गर्नुभएको थियो ।
नेकपा (एमाले) का प्रदेश कमिटी सदस्य ऐनबहादुर चन्द, पालिका पार्टी कमिटी अध्यक्ष डम्बर घर्ती, नेपाली काङ्ग्रेसका सभापति वीरेन्द्र रावत र नेकपा (एकीकृत माओवादी) का अध्यक्ष झुपबहादुर बुढाले शुभकामना मन्तव्य दिनुभएको उक्त कार्यक्रमको सभापतित्व समाजका अध्यक्ष लकिकतसिंह ठकुरीले गर्नुभएको थियो ।
थुमान अधिकारीद्वारा सञ्चालित र विनोद हमालद्वारा स्वागत भाषण र शिक्षक सङ्गठनका अध्यक्षद्वारा धन्यवाद ज्ञापन गरिएको थियो ।
कार्यक्रममा पृथ्वीबहादुर सिंह, निरञ्जना चन्द, कोकिला सिंह, विष्णु महतारा, सीता यरी, श्री विकलगायतका स्रष्टाले कविता, गजल वाचन गर्नुभएको थियो ।
