काठमाडौँ । प्रगतिशील लेखक सङ्घ, नेपालका केन्द्रीय सल्लाहकार रामप्रकाश पुरीले प्रलेस नै सबैभन्दा पुरानो प्रगतिशील रूपान्तरणको पक्षमा काम गर्ने सङ्गठन भएको बताउनुभएको छ ।

प्रलेसको एकाउन्नौँ परिसंवादमा विषयवस्तु प्रस्तुत गर्दै पुरीले भन्नुभयो– ‘श्यामप्रसादले स्थापना गर्नुभएको प्रगतिशील लेखक सङ्घ नै प्रगतिशील सांस्कृतिक रूपान्तरणको पक्षमा काम गर्ने सबैभन्दा पुरानो सङ्गठन हो ।’

२०७८ पुस २ गते शुक्रबार प्रलेसको केन्द्रीय कार्यालय बागबजारबाट भौतिक उपस्थिति तथा भर्चुअल दुवै माध्यमबाट अघि बढेको सो कार्यक्रममा नेकपा (मसाल) का प्रवक्तासमेत रहनुभएका प्रगतिवादी साहित्यकार विषयवस्तु प्रस्तत गर्दै हुनुहुन्थ्यो ।

‘राल्फासहितका अरू साहित्यिक–सांस्कृतिक सङ्गठनहरू त पछि स्थापना भएका हुन्’ पुरीले भन्नुभयो– ‘प्रलेसले २००९ सालदेखि लगातार समाजको प्रगतिशील रूपान्तरणको पक्षमा काम गरिरहेको छ ।’

उहाँले प्रलेस सामन्तवादी, साम्राज्यवादी साहित्य, कला र संस्कृतिको विरुद्धमा काम गर्ने साहित्यकारहरूको संयुक्त मोर्चा भएको बताउँदै यस्तो मोर्चाको आवश्यकता अहिले पनि यथावत नै रहेको बताउनुभयो ।

‘जुन साथीहरूले अहिले पनि सामन्तवाद र साम्राज्यवादको विरुद्धमा साहित्य, कला र संस्कृतिको क्षेत्रबाट मोर्चाबन्दी आवश्यक रहेको ठान्नुहुन्छ’ उहाँले भन्नुभयो– ‘तबसम्म प्रलेसको औचित्यता वा आवश्यकता रहिरहने छ ।’

उहाँले भन्नुभयो– ‘आफू सामेल भए ठिक, आफू सामेल नभए बेठिक हुन्छ भन्ने ठान्नु कुण्ठा हो ।’

उहाँले यस्तो कुण्ठा पालेर प्रलेस जस्तो संयुक्त मोर्चा सञ्चालन हुन नसक्ने बताउँदै यस्तो सोचाइले प्रलेसमा समस्या ल्याउने दाबी गर्नुभयो ।
विषयवस्तु प्रस्तुत गर्ने क्रममा उहाँले भन्नुभयो– ‘विद्यमान संस्कृतिलाई यथास्थितिमा राख्न खोज्नु गलत हो तर त्यसको नाममा अर्को भड्काव ल्याउनु पनि गलत हो ।’

प्रलेस जस्ता साहित्यिक, सांस्कृतिक सङ्गठनले कविता, गीत, निबन्ध, कथा जस्ता सामग्री रचना गर्नु खालि प्रचारात्मक तरिका भएको बताउँदै उहाँले सङ्गठन र सङ्घर्षको माध्यमबाट मात्र समाजको आमूल रूपान्तरण गर्न सकिने ठोकुवा पनि गर्नुभयो ।

प्रलेसका उपाध्यक्ष गोपीरमण उपाध्यायको अध्यक्षता तथा महासचिव समीर सिंहको सञ्चालनमा अघि बढेको सो कार्यक्रममा फ्लोरबाट शशिराम कार्की, जगत् वाशिष्ट, हरिकृष्ण कडायत र आरसी न्यौपानेले पूरक टिप्पणी राख्नुभएको थियो ।

कार्यक्रममा प्रलेसका सल्लाहकार प्राडा कपिल लामिछाने र रामविनय, उपममहासचिव आरसी न्यौपाने, सचिव प्रकाश थापामगर र प्रलेसका पूर्वकेन्द्रीय उपाध्यक्ष खेम थपलियाको पनि आतिथ्यता रहेको थियो ।