जगदीश ढकाल, बाँके।
मिलिनियम च्यालेन्ज कर्पोरेसन (एमसीसी) खारेजीको मागगर्दै विभिन्न ८ राजनीतिक दलले कोहलपुरमा विरोध प्रदर्शन गरेका छन् ।
नेकपा (मसाल), नेकपा (क्रान्तिकारी माओवादी) राष्ट्रिय जनमोर्चा, देशभक्त जनगणतान्त्रिक मोर्चा, नेत्रविक्रम चन्द विप्लव नेतृत्वको नेपाल कम्युनिष्ट पार्टी, विश्वभक्त दुलाल आहुति नेतृत्वको वैज्ञानिक समाजवादी कम्युनिष्ट पार्टी, नेपाल र ऋषि कट्टेल नेतृत्वको नेकपा लगायत राजनीतिक दलहरूले मंगलबार कोहलपुरमा विरोध प्रदर्शन सहित सभा सम्पन्न गरेका हुन्।
एमसीसी सम्झौता विरुद्ध विभिन्न नाराबाजी सहित कोहलपुर चौराहबाट शुरु भएको विरोध जुलुस बजार परिक्रमा गर्दै न्युरोड चोकमा पुगी सभामा परिणत भएको थियो ।
सभालाई सम्बोधन गर्दै अखिल नेपाल किसान महासंघका महासचिव तुलसिराम सापकोटाले संसदबाट एमसीसी सम्झौता पास भएमा नेपालको ऐन कानुन निष्क्रिय हुने बताउनुभयो । उहाँले अमेरिकाले नेपालमा अमेरिकी सेना उतार्ने र चिनलाई घेर्ने अनि हाम्रो देशलाई गृहयुद्धमा धकेल्ने षडयन्त्र भएको हुँदा उक्त सम्झौता खारेज गर्नुको विकल्प नभएको बताउनुभयो । नेता सापकोटाले अहिले यो पार्टी र त्यो पार्टी नभनी सम्पूर्ण देशभक्त जनताहरु राष्ट्र बचाउने संघर्षमा एकजुट हुन अह्वान समेत गर्नुभयो ।
नेकपा (क्रान्तिकारी माओवादी) का पिबिएम भुपेन्द्र न्यौपानेले एमसीसी मार्फत अमेरिकाले नेपालमा बिकासको नाममा बिनास गर्ने र नेपालको श्रोतसाधन काब्जा गरी नेपाललाई रणभुमी बनाउने बताउनुभयो ।
त्यस्तै, अखिल नेपाल युवक संघका महासचिव कृष्णराज पाण्डेले एमसीसी सम्झौतालाई संशोधन होइन पूरै खारेज गरेर मात्र देशको राष्ट्रियता र सार्वभौमसत्ता बचाउन सकिने भएकोले सोही अनुसार आन्दोलन केन्द्रित भएको बताउनु भएको थियो।
नेकपा (विप्लव) बाँकेका सचिव अनिलले उक्त शभामा आफ्नो धारणा राख्दै यदि संसदबाट एमसीसी पारित गर्ने प्रक्रिया अगाडि बढेमा निश्चितरूपमा देशमा ठूलो निर्णायक आन्दोलनको आंधिबेहरी हुने र त्यसको लागि सबै देशभक्त तथा गणतन्त्रवादीहरु एकजुट भएर लाग्न आग्रह गर्नुभएको थियोे ।
देशभक्त जनगणतान्त्रीक मोर्चाकि प्रदेश सदस्य तथा बाँके अध्यक्ष लक्ष्मी चौलागाईंले पनि एमसीसी विरुद्धको आन्दोलनलाई निर्णायक बनाउन संयुक्त आन्दोलन जारी रहने बताउनु भएको थियो । बिरोध सभाको सञ्चालन नेकपाका बिष्णु बिसीले गर्नुभएको थियोे ।
