काठमाडौं । राष्ट्रिय जनमोर्चाका उपाध्यक्ष दुर्गा पौडेलले अहिले पनि देशमा प्रतिगमनको खतरा रहेको बताउनुभएको छ ।
नेपाली कांग्रेसको भृकुटीमण्डपमा जारी १४ औँ महाधिवेशनको उद्घाटन कार्यक्रममा सुभकामना दिँदै पौडेलले अहिले पनि देशमा प्रतिगमनको कालो बादल मडारिरहेको बताउँदै त्यसका विरुद्ध लोकतान्त्रिक शक्तिहरुबीचको सहकार्य अझै आवश्यकता रहेको औँल्याउनुभयो ।
उहाँले राष्ट्रियताका मुद्दामो सबै राजनीतिक दलहरु एक ठाउँमा उभिनुपर्ने बताउनुभयो । राष्ट्रियताका इस्युहरु धेरै चर्को रुपमा रहेका छन्। उहाँले लोकतन्त्राकि आन्दोलनमा कांग्रेसको महत्वपूर्ण भूमिका रहेको उल्लेख पनि गर्नुभयो ।
‘नेपाली कांग्रेसले इतिहासकालदेखि नै प्रजातान्त्रिक आन्दोलनमा धेरै महत्वपूर्ण भूमिका खेल्दै आएको छ। समग्र रुपमा हामी सहकार्य गर्दै पनि, २०४६ सालको आन्दोलनमा, २०६२/०६३ को आन्दोलनमा, संविधानसभाबाट संविधान घोषणा गर्दा सहकार्य गरेर अगाडि बढ्यौँ’ उहाँले भन्नुभयो, ‘त्यसले एउटा महत्वपूर्ण काम लोकतान्त्रिक गणतन्त्र, धर्मनिरपेक्षता, समावेशिता, महिलाहरुको अधिकार सुनिश्चित गर्न धेरै महत्वपूर्ण काम गरेको छ । अहिले पनि प्रतिगमनविरुद्ध नेपाली कांग्रेससहितको गठबन्धनले महत्वपूर्ण भूमिका खलेको छ ।’
पौडेलले प्रतिगमनको खतरा र राष्ट्रियताको सवालमा लोकतान्त्रिक शक्तिहरु एक जुट हुन पनि आह्वान गर्नुभयो ।
‘अहिले पनि विभिन्न प्रकारले प्रतिगमनको खतरा आइरहेको अवस्थामा त्यसलाई अझै सशक्त ढंगले चिर्नको निम्ति, राष्ट्रियताका मुद्दामा, देश र जनताको इच्छा, आकांक्षलाई सम्बोधन गर्न सही प्रकारको निकास दिन लोकतान्त्रिक शक्तिहरु एकजुट हुनुपर्छ’ पौडेलले भन्नुभयो ।
