काठमाडौं । नेपाल कम्युनिस्ट पार्टी (मसाल)ले राष्ट्रिय जनमोर्चाका सदस्य विष्णुदत्त उपाध्यायको निधनप्रति गहिरो दुःख व्यक्त गरेको छ । आइतबार शोक विज्ञप्ति प्रकाशित गरी मसाल प्रवक्ता रामप्रकाश पुरीले मृतकप्रति श्रद्धाञ्जली अर्पण गर्नुका साथै शोक सन्तप्त परिवारजनमा समवेदना प्रकट गर्नुभएको छ ।
राजमो नेता आनन्द शर्माका बुवा तथा राजमोका केन्द्रीय सदस्य सुधा पौडेलका ससुराबुबा उपाध्याको सत्प्रयासबाट पार्टी आन्दोलनमा महत्वपूर्ण योगदान पुगेको उल्लेख गर्दै प्रवक्ता पुरीले ‘उपाध्यायको मृत्युबाट हाम्रो पार्टीको आन्दोलनलाई गम्भीर क्षति पुग्न गएको छ’ भन्नुभएको छ ।
शोक विज्ञप्तिमा भनिएको छ, ‘बाग्लुङ जिल्ला जैमुनि नगरपालिका–७ निवासी राष्ट्रिय जनमोर्चाका सदस्य का. विष्णुदत्त उपाध्यायको ८२ वर्षको उमेरमा क्यान्सर रोगका कारण मृत्यु भएको छ । उहाँ राष्ट्रिय जनमोर्चाका नेता का आनन्द शर्माका बुवा तथा राष्ट्रिय जनमोर्चाका केन्द्रीय सदस्य का. सुधा पौडेलका ससुरा बुवा हुनुहुन्छ । हामीले उहाँको मृत्युप्रति गम्भिर दुःखका साथ का. आनन्द शर्मा, का. सुधा पौडेल सहित सम्पूर्ण परिवारजनमा समवेदना प्रकट गर्दछौँ ।
का. उपाध्यायको सत्प्रयासले उहाँका परिवारका विभिन्न सदस्यहरूबाट हाम्रो पार्टीको आन्दोलनमा महत्वपूर्ण योगदान पुग्दै आएको छ । त्यसरी हाम्रो पार्टीको आन्दोलनको विकासमा सत्प्रयासरत रहँदै आउनुभएका का. उपाध्यायको मृत्युबाट हाम्रो पार्टीको आन्दोलनलाई गम्भीर क्षति पुग्न गएको छ । अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।’
उपाध्यायको मंसिर ११ गते बिहान आफ्नै निवास जैमुनी–७ जैदी बागलुङमा निधन भएको थियो । करिब एक महिनादेखि काठमाडौंमा उपचार गराउँदासमेत उहाँको स्वास्थ्यमा सुधार हुन नसकेपछि केही दिनअघि मात्रै घर लगिएको थियो ।
