प्युठान । ओखरकोट पर्यटन एवं ग्रामीण विकास सेवा समितिको अध्यक्षमा दुर्गा पौडेल चयन हुनुभएको छ । बुधबार भएको ५ औँ साधारणसभाले पौडेलको अध्यक्षतामा ११ सदस्यीय नयाँ कार्यसमिति निर्वाचित गरेको हो ।
राष्ट्रिय जनमोर्चाका उपाध्यक्ष एवम् सांसद दुर्गा पौडेलकै पहलमा ओखरकोट क्षेत्रको विकासका लागि भन्दै पाँच वर्षअघि सो समिति गठन भएको थियो ।
समितिको उपाध्यक्षमा तिलकबहादुर जिसि, महासचिवमा सुवाश जिसि, सचिवमा राजेन्द्रविक्रम सिंह र कोषाध्यक्षमा राधा जिसि चयन हुनुभएको छ । सदस्यहरुमा सकुन्तला जिसि, निमबहादुर विक, सावित्रा श्रेष्ठ, सारदा थापा, विकल्प जिसि र एक स्थान रिक्त रहेको छ ।
सभामा झिमरुक गाउँपालिकाका अध्यक्ष तिलक जिसि, राष्ट्रिय जनमोर्चा झिमरुकका अध्यक्ष शिद्दिमान जिसि, समाजसेवी ढुण्डिराज पोख्रेल लगाएतको उपस्थिति रहेको थियो ।
सभाले संस्थाको प्रगति प्रतिवेदन र आर्थिक प्रतिवेदन पारित गर्नुका साथै आगामी कार्यक्रम बारे निर्णय गरेको छ । ओखरकोट, झिमरुक र गौमुखी क्षेत्रको साथै प्युठान जिल्लाको पर्यटन र विकासको लागि आवश्यक पहल थाल्ने सभाले निर्णय गरेको छ ।
ओखरकोटको कोट र ढाँडाको रक गार्डेनको डीपीआरको कार्यान्वयन, ओखरकोट सामुदायिक भवन र नेपाने रङ्गशालाको निर्माणलाई पूर्णता, रिसोर्टको निर्माण, बाग्दुला–भिमगिठे सडक निर्माण, खलंगा–गुल्मी रणनैतिक सडक निर्माण, वैज्ञानिक बाल उद्यान, ओखरकोट मिनि केवलकार निर्माण, कौछे-भुल्के वन पर्यटन डिपिआर निर्माण, इख्नाथान दियाल्ना पर्यटन विकास, गौमुखी क्षेत्र पर्यटन विकास, स्वर्गद्वारी तथा ऐरावती पर्यटन विकासकोलागि आवश्यक बजेटको माग तथा कार्यान्वयनको लागि नेतृत्व दिनुका साथै पहल गर्ने निर्णय गरिएको छ ।
सभाको अध्यक्षता राजेन्द्रविक्रम सिंह र सञ्चालन सुवाश जिसिले गर्नुभएको थियो ।
