काठमाडौँ । प्रगतिशील लेखक सङ्घ, नेपालको पचासौँ परिसंवाद कार्यक्रम सम्पन्न भएको छ ।
“साहित्य सन्ध्याको प्रगतिशील लेखनमा भूमिका” विषयक सो कार्यक्रम २०७८ मङ्सिर ३ गते प्रलेस केन्द्रीय कार्यालय बागबजारमा भौतिक उपस्थिति र भर्चुअल दुवै माध्यमबाट सम्पन्न भएको थियो ।
केन्द्रीय अध्यक्ष प्रा.डा. जीवेन्द्र देव गिरीको प्रमुख आतिथ्यता रहेको उक्त कार्यक्रममा प्राज्ञ विष्णु प्रभातले विषयवस्तु प्रस्तुत गर्नुभएको थियो ।
सो क्रममा उहाँले नेपाली भाषाको उन्नयनका लागि साहित्य सन्ध्याको सुरुवात भएको बताउनुभयो ।
‘२०३७ साल मङ्सिर ६ गते स्थापित साहित्य सन्ध्या पछिल्लो समयमा निरङ्कुश पञ्चायती व्यवस्था विरुद्ध उभियो’ प्रभातले भन्नुभयो– ‘पछिल्लो समयमा साहित्य सन्ध्याले प्रगतिशील साहित्य लेखनको पक्षमा भूमिका खेलिरहेको छ ।’
राजविराजबाट सुरु भएको सो साहित्यिक यात्रा काठमाडौँका विभिन्न कलेजमा घुम्ती यात्राको रूपमा अघि बढेको उहाँले बताउनुभयो ।
प्रभातले साहित्य सन्ध्यामा साहित्यिक–सांस्कृतिक व्यक्तित्वको परिचर्चाका साथै जोकसैले त्यहाँ आफ्ना रचना वाचन गर्ने अवस्था रहेको जानकारी दिनुभयो ।
पारिजात, युद्धप्रसाद मिश्र, केवलपुरे किसान जस्ता साहित्यकारको प्रत्यक्ष उपस्थिति रहने गरेको सो साहित्यिक यात्रामा पछिल्लो समयमा श्रोता पुरस्कार प्रदान गर्न थालिएको उहाँले बताउनुभयो ।
प्राज्ञ प्रभातले साहित्य सन्ध्याले बेग्लाबेग्लै परिस्थितिमा विभिन्न प्रकारले प्रगतिशील साहित्यमा योगदान पुर्याएको उल्लेख गर्नुभयो ।
उपाध्यक्ष गोपीरमण उपाध्यायको अध्यक्षता तथा महासचिव समीर सिंहको सञ्चालनमा अघि बढेको उक्त कार्यक्रममा प्रमुख अतिथि अध्यक्ष प्रा.डा. जीवेन्द्र देव गिरीले पनि मन्तव्य राख्नुभएको थियो ।
सो अवसरमा साहित्य सन्ध्याका अध्यक्ष राम विनय र वासुदेव अधिकारी, प्रलेसका पूर्व अध्यक्ष मातृका पोखरेल र अध्यक्ष प्रा.डा गिरीले पूरक टिप्पणी राख्नुभएको थियो ।
उक्त कार्यक्रममा प्रलेसका उपमहासचिव आरसी न्यौपाने, सचिव प्रकाश थापामगर, कोषाध्यक्ष धु्रवकुमार घिमिरे, सचिवालय सदस्य देवी दुलाल क्षेत्री, पारस ढकाल, केन्द्रीय सस्य कमल कार्कीलगायतको आतिथ्यता रहेको थियो ।
