हेम बिजी ##

पुग्ने दुरी पनि एउटै छ हाम्रो
बदल्ने दुनियाँ पनि एउटै छ हाम्रो
र ढाल्ने
दुश्मन पनि एउटै छ हाम्रो
त्यसैले
दुरी, दुनियाँ र दुस्मन
बुझाइमा फरक छ भने पनि
फेरि बुझौँ
सोचाइमा फरक छ भने पनि
फेरि सोचौँ ।

हिजो
तिमी जस्तै
गीत गाउँदै क्रान्तिको
मूल बाटो छोड्नेहरू
आज
सानो गल्लीतिर
प्रतिक्रान्तिको भाकामा नाच्दै छन्
तिमी पनि
उस्तै र उनीहरू जस्तै
बासी आरोपमा नडुब
बुझ
क्रान्ति आकाङ्क्षामा होइन
आवश्यकतामा हुन्छ ।

आखिर
तिम्रो अँध्यारो रात
र हाम्रो अध्यारो रात एउटै छ
तिम्रो र हाम्रो
उज्यालो मुक्तिको दिन
एउटै छ
त्यसैले
साना साना झिल्काहरू निकाल्दै
अलग्गै हिड्छौँ किन
आखिर
अन्धकार रात फाल्न
बाल्नैपर्छ मसालको राँको
त्यसैले
आऊ सँगै अध्यारो फालौँ
आऊ सँगै मसाल बालौँ ।