काठमाडौं । नेपाल बार एसोसिएसनले प्रधानन्यायाधीश चोलेन्द्र शमशेर जबराको राजीनामा नआएसम्म आन्दोलन नरोकिने स्पष्ट पारेको छ । बार एसोसिएसनले बिहीबार पत्रकार सम्मेलन गरी न्यायधीशहरु काममा फर्किए पनि बारले आन्दोलनलाई निरन्तरता दिने जनाएको छ ।
बार एसोसिएसनका अध्यक्ष चण्डेश्वर श्रेष्ठले शुक्रबारसम्म प्रधानन्यायाधीशको राजीनामा नआए आफूहरुले थप सशक्त कार्यक्रम ल्याउने चेतावनी दिनुभयो । अध्यक्ष श्रेष्ठले प्रधानन्यायाधीश जबराले सर्वोच्च अदालतमा अनियमितता र भ्रष्टाचारको नेतृत्व गरेको आरोप पनि लगाउनुभयो ।
प्रधानन्यायाधीशमा नियुक्त भएदेखि नै जबराले न्यायालयमा भ्रष्टाचार र अनियमितताको अध्याय सुरु गरेको उहाँको भनाइ थियो ।
बिहीबार प्रहरी हस्तक्षेपका कारण चोट लागेका श्रेष्ठले भन्नुभयो, ‘म आफ्नो शरीरमा लागेको घाउलाई भरे सेक्नेछु र यसलाई निको तुल्याउने छु तर यो आन्दोलनबाट भाग्दिनँ ।’
सर्वोच्च अदातलमा बिहीबार बसेको ‘फुलकोर्ट’ बैठकले गोलाप्रथा लागू गर्ने गरी नियमावली पारित गरेको सन्दर्भमा अध्यक्ष श्रेष्ठले सर्वोच्च अदालतका सबै न्यायाधीशहरु काममा फर्किए पनि प्रधानन्यायाधीश चोलेन्द्र शमशेर जबराविरुद्धको आन्दोलन जारी राख्ने चेतावनी दिनुभयो ।
‘हामीले न्यायाधीशहरुको भरमा आन्दोलन गरेका होइनौँ । उहाँहरु काममा फर्किए पनि बारको आन्दोलन जारी रहन्छ’ उहाँले भन्नुभयो, ‘हामी प्रधानन्यायाधीशको राजीनामा नआएसम्म रोकिन्नौँ।’
न्यायको मन्दिरलाई युद्ध मैदान बनाइयो
बार एसोसिएसनले बिहीबार सर्वोच्च अदालतमा धर्ना दिने क्रममा प्रहरीले हस्तक्षेप गरेको भन्दै आपत्ति जनाएको छ । दंगा प्रहरीले युद्धमा प्रयोग गर्ने एसएलआर बोकेर सर्वोच्च अदालतमा प्रवेश गरेको र भिजिलान्ते प्रयोग गरी कानुन व्यवसायीमाथि हातपात गरिएको बारले जनाएको छ ।
पत्रकार सम्मेलनमा नेपाल बार एसोसिएसनका उपाध्यक्ष ईश्वरी भट्टराईले भन्नुभयो, ‘आज पहिलो पटक दंगा प्रहरीका साथ एसएलआर जस्तो युद्धको बेलामा प्रयोग गरिने हतियारधारी प्रहरी प्रवेश गराएर न्यायको मन्दिरलाई युद्ध मैदान बनाउने कार्यको हामी घोर भर्त्सना र निन्दा गर्दछौं । अदालत परिसरलाई युद्ध मैदान बनाउन अनुमति दिने प्रधानन्यायाधीश र अदालत प्रशासनको यस्तो हर्कतले हामीलाई स्तब्ध बनाएको छ ।’
शान्तिपुर्ण कार्यक्रममा प्रहरीले गरेको हस्तक्षेपबाट अध्यक्ष चण्डेश्वर श्रेष्ठसहित केही अधिवक्ता घाइते भएको बारले विज्ञप्तिमार्फत जनाएको छ ।
