काठमाडौं । राष्ट्रिय जनमोर्चाले पाँच दलीय समन्वय समिति सरकार सञ्चालनसम्बन्धी संयन्त्र नरहेको स्पष्ट पारेको छ । मंगलबार एक वक्तव्य प्रकाशित गरी राजमोले कतिपय सञ्चारमाध्यमले समन्वय समितिाई सरकार सञ्चालनसम्बन्धी संयन्त्र बताइरहेको भन्दै भ्रममा नपर्न पनि आग्रह गरेको छ ।
उपाध्यक्ष दुर्गा पौडेलले प्रेशित गर्नुभएको वक्तव्यमा भनिएको छ, ‘कतिपय सामाजिक सञ्जाल, पत्र–पत्रिका वा व्यक्तिहरूले त्यो समितिलाई सरकारको सञ्चालन सम्बन्धी संयन्त्र नै भएको बताइरहेका छन् । तर त्यो भ्रामक टिकाटिप्पणी हो ।’
यस्तै, राजमोले समन्वय समिति सरकारको सञ्चालनको संयन्त्र नभए पनि त्यसले आपसी छलफल र विचार विमर्शद्वारा सरकारलाई सहयोग पु-याउन सक्ने विश्वास लिएको छ ।
साथै, पाँच दलीय गठबन्धनको औचित्य अहिले पनि कायमै रहेको राजमोको ठहर छ । समन्वय समितिले संविधानको रक्षा र कार्यान्वयनमा मद्दत पुर्याउने पनि वक्तव्यमा स्पष्ट पारिएको छ ।
यस्तो छ वक्तव्य :
हिजो २०७८ साल कार्तिक २२ गते बसेको पाँच दलीय बैठकले गरेका कतिपय निर्णयहरूबारे उठेका प्रश्नहरूमा प्रकाश हाल्नका लागि यो वक्तव्य जारी गरिएको छ ।
१. हिजो बसेको पाँच दलीय बैठकले पाँच दलको गठबन्धनको कामलाई अरू व्यवस्थित र प्रभावशाली बनाउनको लागि एउटा समन्वय समिति बनाउने निर्णय गरेको छ । पहिले सरकारको सञ्चालनको लागि पाँच दलीय संयन्त्र बनाउने कुरा उठेको थियो । तर हाम्रो पार्टी सरकारमा सामेल नभएको हुनाले हामीले त्यस प्रकारको संयन्त्रमा नबस्ने कुरा स्पष्ट गरेका थियौँ । तर अहिले बनेको समिति सरकारको सञ्चालन सम्बन्धी संयन्त्र नभएको कुरा हामीले स्पष्ट गर्न चाहान्छौँ । कतिपय सामाजिक सञ्जाल, पत्र–पत्रिका वा व्यक्तिहरूले त्यो समितिलाई सरकारको सञ्चालन सम्बन्धी संयन्त्र नै भएको बताइरहेका छन् । तर त्यो भ्रामक टिकाटिप्पणी हो ।
२. आज बिहान कान्तिपुरको अन्तवार्तामा माओवादी नेता का. नारायणकाजी श्रेष्ठ (प्रकाश) ले पनि त्यो विषयमा प्रकाश हाल्दै त्यो समिति सरकारको संचालन सम्बन्धी संयन्त्र नभएको कुरा प्रष्ट गर्नु भएको छ ।
३. विघटित संसदको पुनस्र्थापना भएको भए पनि र ओली सरकार खारेज भएको भए पनि देशमा अझै प्रतिगमनको खतरा छ भन्ने हाम्रो स्पष्ट सोचाइ छ । ओलीले अहिले पनि संसदलाई असफल पार्न पूरै प्रयत्न गरिरहेका छन् । उनको योजना चुनावमा गएर दुई तिहाई बहुमत प्राप्त गर्ने र त्यसपछि संसदमा संविधान संशोधनका लागि प्रयत्न गर्ने नै रहेको छ । उनको कार्यशैलीमाथि विचार गर्दा उनले प्रतिगमनलाई मदत पुग्ने, राष्ट्रियतामाथि आघात पु-याउने तथा देशलाई अधिनायकवादतिर लैजाने दृष्टिकोणले नै संविधानमा संशोधन गर्न प्रयत्न गर्ने नै बढी सम्भावना देखिन्छ । त्यसैले त्यस प्रकारको खतराबाट देशलाई बचाउन चुनावसम्म नै अहिलेको गठबन्धनको एकतालाई कायम राख्नुपर्ने आवश्यकता छ ।
४. कतिपय मानिसहरुले नेका, माओवादी समेतसित गठबन्धन गर्ने हाम्रो पार्टीको नीतिको पनि आलोचना गरेको देखिन्छ । वस्तुस्थितिको आवश्यकता अनुसार विश्वभरमा नै र नेपालमा पनि बेग्लै राजनीतिक चरित्र भएका अन्य राजनीतिक शक्तिहरूसित त्यस प्रकारको संयुक्त मोर्चा वा कार्यगत एकता गर्ने अभ्यास रहँदै आएको छ ।
५.यो इतिहासद्वारा प्रमाणित भएको कुरा हो कि २०४६ सालमा वामपन्थीहरूले नेका समेतसित कार्यगत एकता नगरेको भए निरङ्कुश राजतन्त्र र पञ्चायती तानाशाही व्यवस्थालाई समाप्त गर्नु सम्भव हुने थिएन । त्यसै गरेर २०६२/०६३ सालमा वामपन्थी, नेका र मधेशवादीहरू समेतसित सहकार्य नगरेको भए प्रतिगमनलाई पराजित गर्नु र पछि संविधान सभाको चुनाव सम्पन्न गर्नु तथा राजतन्त्रलाई समाप्त गरेर गणतन्त्र कायम गर्नु सम्भव हुने थिएन । त्यही प्रकारले अहिले पाँच दलीय गठबन्धन नबनेको भए ओलीको प्रतिगमनलाई पराजित गर्नु सम्भव हुने थिएन ।
६. त्यसरी इतिहासका बेग्लाबेग्लै कालखण्डहरूमा विश्वभरमा र नेपालमा पनि संयुक्त मोर्चा वा कार्यगत एकताको पनि ऐतिहासिक महत्व रहने गरेको छ । प्रतिगमन पक्षधर वा पिछडिएको राजनीतिक सोचाइ भएका व्यक्तिहरूले नै संयुक्त मोर्चा वा कार्यगत एकता र तिनीहरूद्वारा प्राप्त उपलब्धिहरूको महत्वलाई ठिकसँग बुझ्न सक्दैनन् ।
७. हिजो बसेको पाँच दलीय बैठकमा उपनिर्वाचन वा राष्ट्रिय सभाका चुनावहरूमा मिलेर जाने सहमति भएको छ । हाम्रो स्पष्ट मत छ कि त्यसरी नै प्रतिगमनलाई पराजित गर्नु सम्भव हुनेछ । विभिन्न चुनाव वा आन्दोलनहरूमा भएका सहमतिहरूलाई दृढता र इमान्दारितापूर्वक पालन गर्ने हाम्रो पार्टीको इतिहास रहेको छ। तर हामीलाई यो कुराको पनि कटु अनुभव रहने गरेको छ कि स्वयम् वामपन्थी शक्तिहरुले पनि गतकालमा राष्ट्रिय सभा, संसद वा स्थानीय तहमा भएका कतिपय सहमतिहरूको उलङ्घन गर्ने गरेका छन् र सहमतिमा खडा भएका हाम्रो पार्टीका उम्मेद्वारहरू बाहेक अन्य पक्षहरूलाई मतदान गरेर सहमतिका उम्मेदवारहरुलाई पराजित र्ने पनि गरेका छन् ।
८. सँधै त्यस्तो हुने गरेको छ भन्ने हाम्रो निष्कर्ष छैन । तर कतिपय बेला त्यस्तो पनि हुने गरेको छ । तैपनि देशको राष्ट्रिय आवश्यकताअनुसार हामीले अन्य पक्षहरुसित पनि आन्दोलन वा चुनावमा सहमति गर्दै आएका छौँ । त्यही प्रकारले पाँच दलीय सहमतिलाई पनि इमान्दारितापूर्वक कार्यान्वय गर्ने हाम्रो प्रयत्न हुनेछ र त्यसरी नै पाँच दलीय एकतालाई कायम राख्नु तथा प्रतिगमनमाथि निर्णायात्मक विजय प्राप्त गर्नु सम्भव हुनेछ भन्ने हाम्रो विश्वास छ ।
९. हाम्रो पार्टी गठबन्धनको सरकारमा सामेल नभएपनि बाहिरबाट त्यसलाई समर्थन गर्ने हाम्रो नीति रहेको छ । त्यस अनुसार समन्वय समितिले पनि गठबन्धनको सरकारलाई सहयोग पुर्याउने प्रयत्न गर्नेछ । तर त्यसका साथै सरकारका गलत प्रकारका कार्यशैली वा क्रियाकलापहरूलाई संसदभित्र वा बाहिर आलोचना वा विरोध गर्ने हाम्रो नीति रहने कुरा पनि हामीले स्पष्ट गर्दै आएका छौँ । त्यसरी सरकारको नीति वा कार्यशैलीका नीतिहरूमा भएका गल्ती वा कमजोरीहरूलाई सुधार्न सकिन्छ र त्यसलाई (सरकारलाई) अरु बढी सहयोग पु-याउन सकिन्छ भन्ने हाम्रो विश्वास रहेको छ । अहिले बनेको समन्वय समिति सरकारको सञ्चालनको संयन्त्र नभएपनि त्यसले आपसी छलफल र विचार विमर्शद्वारा सरकारलाई सहयोग पु¥याउन सक्नेछ भन्ने हाम्रो विश्वास छ ।
दुर्गा पौडेल
उपाध्यक्ष तथा प्रवक्ता
उच्चस्तरीय समन्वय समिति सरकार सञ्चालनसँग सम्बन्धित छैन : पौडेल
राष्ट्रियसभा र उपनिर्वाचनमा पाँच दलले सहकार्य गर्ने
