काठमाडौं । नेकपा (एमाले) का अध्यक्ष एवम् पूर्वप्रधानमन्त्री केपी ओली र जनता समाजवादी दलका संघीय परिषद अध्यक्ष एवम् पूर्वप्रधानमन्त्री डा. बाबुराम भट्टराईबीच रोचक दोहोरी चलेको छ ।

दुवै पूर्व प्रधानमन्त्रीले सार्वजनिक कार्यक्रम तथा सामाजिक सञ्जालमार्फच एक अर्कालाई घोचपेच गरेका छन् । एमाले अध्यक्ष केपी ओलीले जनयुद्धकालमा बाबुरामले आफ्नी छोरीलाई बेलायत पढ्न पठाएको भन्दै त्यत्रो पैसा कहाँबाट आयो भनी प्रश्न गर्नुभएको छ । भट्टराईले भने ओलीको भनाई ‘अशोभनीय’ भएको भन्दै त्यसलाई प्रमाणित गर्न चुनौति दिनुभएको छ ।

अध्यक्ष ओलीले आइतबार एक कार्यक्रममा पूर्वप्रधानमन्त्री डा. बाबुराम भट्टराईलाई जनयुद्ध कालमा आफ्नो छोराछोरीलाई कसरी बेलायतमा पढाउन सक्नु भयो भनेर प्रश्न गर्नु भयो । आफूहरुले पासपोर्ट बनाउन नसक्ने बेला कसरी पार्सपोट बनाएर भट्टराईले आफ्ना छोराछोरीलाई बेला बढाउन भयो ? बेलायत बढाउने आम्दानीको स्रोत के थियो ? अध्यक्ष ओलीको जिज्ञासा थियो ।

ओलीले भन्नु भयो, ‘प्रचण्ड बाँचे १७ हजार मरे । बाबुराम त बाँचे । बाबुरामका छोराछोरी त बेलायत पढथे । हामी बेलायत जान भिसा मिल्दैन थियो । बाबुरामका छोराछोरीले भिसा पाउँथे । कसरी होला भन्नुस् त ? एउटा भूमिगत क्रान्तिकारी नेताका छोराछोरीको बाउको नाम त चाहिन्छ । नागरिक पाउन, पासर्पोट पाउन, सबै चिज पाउन । कसेको पार्सपोर्टबाट जानु भएको थियो बेलायत ? कहाँ भिसा लागेको थियो ? बाबुरामजी बताई दिनुस त ? तपाईका छोराछोरीले बेलायतको शिक्षा, जहाँ कम्सेकम २÷४, ५ लाख महिनाको खर्च हुन्छ । छोराछोरीलाई कसरी पढाउनु भएको थियो ? कहाँको आम्दानीले भूमिगत हिँडदाखेरी ?’

यता, डा. भट्टराईले एमाले अध्यक्ष ओलीलाई आफ्नी छोरी मानुसी जनयुद्धकालमा बेलायत पढ्न गएको प्रमाणित गर्न चुनौति दिनुभएको छ । आइतबार ट्वीट गर्दै नेता भट्टराईले पूर्वप्रधानमन्त्री जस्तो व्यक्तिले उडन्ते, तथ्यहीन कुरा गरेको आरोप लगाउँदै यस्ता कुराले शोभा नदिने बताउनुभयो ।

‘मित्र खड्गप्रसादजी, पूर्वप्रम जस्तो मान्छेले तथ्यहीन उडन्ते कुरा गर्नु शोभनीय भएन । हाम्री छोरी मानुषी ७ वर्षको उमेरमा जनयुद्धपूर्व २०४९–५१मा आमा हिसिला छात्रवृत्तिमा बेलायत पढ्न गएको बेला सँगै गएर सँगै फर्केकी हुन्। त्यस यता उनी बेलायत गएको प्रमाणित गर्नोस् न !’ भट्टराईको ट्वीटमा भनिएको छ ।