काठमाडौँ । सल्यानमा बस दुर्घटनामा परी १२ जनाको मृत्यु भएको छ ।
जिल्लाको दुल्धारापोखराबाट दाङको तुलसीपुर जाँदै गरेको ना२ख २५५२ नं. को बस २०७८ कात्तिक २१ गते बिहान ११ बजे कपुरकोट गाउँपालिकाको खारखोलामा दुर्घटना भएको हो ।
दुर्घटनामा परी मृत्यु हुनेमा १० जना पुरुष र दुई जना महिला रहेका छन् । घटनास्थलमा छ जनाको र अस्पतालमा छ जनाको गरी १२ जनाको मृत्यु भएको हो । मृत्यु हुनेमा दुई जना बालबालिका पनि छन् ।
मृत्यु भएकाको सनाखत भइनसकेको जिल्ला प्रहरी कार्यालय सल्यानका प्रहरी उपरीक्षक गोविन्द थापाले जानकारी दिनुभयो ।
प्रहरीले घटनास्थलमा पुगेर घाइतेको उद्धार गरिरहेको छ । केही घाइतेको अवस्था गम्भीर रहेकाले मृतकको सङ्ख्या बढ्न सक्ने प्रहरीको भनाइ छ ।
दुर्घटनामा कम्तीमा २० जना घाइते भएका प्रहरीले बताएको छ । घाइतेमध्ये गम्भीर अवस्थाका सात जनालाई उपचारका लागि नेपालगञ्ज पठाइएको छ । दुर्घटनामा परी घाइते भएकाको जिल्ला अस्पताल सल्यान, श्रीनगर सल्यान तथा दाङको तुलसीपुर अस्पतालमा उपचार सुरु भएको जानकारी दिनुभयो ।
बस सडकभन्दा करिब २०० मिटर तल खसेको छ । बसमा करिब ४० जना यात्रु रहेको अनुमान गरिएको छ । प्रहरीले मृतक तथा घाइतेको विवरण सङ्कलन गरिरहेको जनाएको छ ।
दुर्घटनाका कारण खुलिसकेको छ्रैन तर प्रहरीले तीव्र गतिका कारण बस दुर्घटना भएको प्रारम्भिक अनुमान गरेको छ । तिहार मनाएर सहरतर्फ फर्किँदै गरेकाहरू दुर्घटनामा परेका हुन् ।
