काठमाडौं । देशको भूगोल विदेशीले अतिक्रमण गरिरहँदा रक्तिम सांस्कृतिक अभियानका कलाकारहरुले त्यस विरुद्ध सशक्त आवाज लिएर आएका छन् । भारतीय साम्राज्यवादलाई चेतावनीसहित जनतालाई एक जुट हुन आह्वान गर्दै ‘छोड छोड साम्राज्यवाद हाम्रो जमिन छोड’ बोलको गीत सार्वजनिक गरिएको हो ।

रक्तिमका सचिव हेमराज आश्रमको शीर्ष स्वर रहेको गीतमा साथीहरु मेनुका कार्की, शोभा गोपाली, सजना भट्टराई, चक्र चनरा, राजेश थामी, रुपक भट्टराई, रञ्जना मुखिया र सविता दाहालले स्वरमा साथ दिएका छन् । सो गीतको शब्द तथा संगीत हेमराजकै रहेको छ ।

मंगलबार सार्वजनिक गरिएको गीतको म्युजिक भिडियोमा विगतको विशाल नेपाल तथा अहिले भारतले अतिक्रमण गरेको भूभागलाई नक्सामा देखाइएको छ । गीतले राष्ट्रियता रक्षाका लागि नेपाली जनतालाई एकजुट हुन अपिल गरेको छ ।