काठमाडौँ । निर्वाचन आयोगले यही वर्षको चैत ५ गतेभित्र स्थानीयतहको चुनाव गर्न सरकारसँग सिफारिस गरेको छ ।
सोमबार प्रधानमन्त्री शेरबहादुर देउवासँगको छलफलका क्रममा आयोगले चैत ५ गतेभित्र स्थानीयतहको निर्वाचन गर्न सिफारिस गरेको हो ।
स्थानीयतहका सम्पूर्ण पदाधिकारीको कार्यकाल आगामी जेठ ५ गते सकिँदै छ । २०७४ वैशाख ३१ मा चुनाव भएको ७ दिनदेखि गणना गर्दा कार्यकाल जेठ ५ गते सकिने देखिएको आयोगको भनाइ छ ।
कार्यकाल सकिएको ६ महिनाभित्र चुनाव गर्नुपर्ने संविधानमा लेखिए पनि निर्वाचनसम्बन्धी कानुनमा म्याद सकिनुभन्दा दुई महिनाअघि चुनाव गर्नुपर्ने भन्ने भएकाले जेठ ५ अघि नै चुनाव गर्नुपर्ने देखिएकाले सोहीअनुसार सिफारिस भएको प्रमुख निर्वाचन आयुक्त दिनेशकुमार थपलियाले जानकारी दिनुभयो ।
यसैबिच, स्थानीयतहका रिक्त जनप्रतिनिधिको पदपूर्ति गर्न अब स्थानीयतहको उपनिर्वाचन गर्नुनपर्ने भएको छ । स्थानीयतहको कार्यकाल धेरै बाँकी नरहेकाले अब उपनिर्वाचन गर्नुनपर्ने आयोगको भनाइ छ तर प्रदेश र प्रतिनिधि सभाका रिक्त सांसदको विषयमा उपनिर्वाचन गर्न के गर्ने भन्ने विषयमा भने आयोगले सरकारको धारणा मागेको छ ।
जवाफमा प्रधानमन्त्री देउवाले दलसँग छलफल गरेर यसबारे निर्णय लिइने बताएका छन् ।
त्यस्तै, आयोगले राष्ट्रियसभाको फागुनदेखि रिक्त हुने २० पदमा आगामी माघको पहिलो साता निर्वाचन गर्न प्रस्ताव गरेको छ ।
