काठमाडौँ । भारत सरकारले जयनगर–कुर्था सीमापार रेलमार्ग नेपाल सरकारलाई हस्तान्तरण गरेको छ । शुक्रबार एक कार्यक्रमबिच सो रेलमार्ग हस्तान्तरण गरेको हो ।
भारत सरकारको सहयोगमा निर्मित जयनगर–कुर्था सीमापार रेलमार्ग भौतिक पूर्वाधार तथा यातायात मन्त्री रेनुकुमारी यादव र नेपालका लागि भारतीय राजदूत विनय मोहन क्वात्राको उपस्थितिमा नेपाललाई हस्तान्तरण गरिएको हो ।
समारोहमा भारत सरकारको तर्फबाट परियोजनाको कार्यान्वयन निकाय आई.आर.सी.ओ.एन. इन्टरनेसनल लिमिटेडले सो रेल खण्ड नेपाल सरकारको तर्फबाट उपस्थित नेपाल रेलवे कम्पनी लिमिटेडलाई हस्तान्तरण गरेको नेपालस्थित भारतीय दूतावासले प्रेस विज्ञप्तिमा जनाएको छ ।
भारत सरकारको आर्थिक सहयोगमा भारतको जयनगरदेखि नेपालको कुर्थासम्मको ३४.९ किलोमिटर न्यारो गज खण्डलाई ब्रोड गजमा रूपान्तरण गर्ने कार्य सम्पन्न भएको थियो ।
भारतको आर्थिक सहयोगअन्तर्गत नेरु ८.७७ अर्ब रुपिँयामा निर्माण भएको ३४.९ किलोमिटर जयनगर–कुर्था खण्ड ६८.७२ किलोमिटर जयनगर–बिजलपुरा–बर्दिबास रेलमार्गकै एक हिस्सा रहेको दूतावासले जनाएको छ ।
“यो खण्ड पहिले जयनगर र बिजलपुराबिच न्यारो गज रेलमार्गको रूपमा रहेको थियो । जयनगर–कुर्था खण्डमा कुल आठओटा स्टेसन र साना स्टेसन रहेका छन्, जसमा जनकपुरको ऐतिहासिक महत्त्वको सहर पनि सामेल छ’ विज्ञप्तिमा भनिएको छ ।
एकपटक सञ्चालनमा आए लगत्तै यो भारत र नेपालबिचको पहिलो ब्रोड गज सीमापार रेलमार्ग हुने दूतावासले उल्लेख गरेको छ ।
“यसले दुई देशबिचको व्यापार र वाणिज्य गतिविधिलाई थप बढावा दिनुका साथै जनताबिचको सम्बन्धलाई अझ सुदृढ गर्ने छ” विज्ञप्तिमा भनिएको छ ।
सीमापार रेल सञ्जाल दुई देशबिचको द्विपक्षीय सहकार्यको महत्त्वपूर्ण पाटो रहिआएको छ, जसमा जयनगर–बिजलपुरा–बर्दिबास रेलमार्ग र १८.६ किलोमिटर जोगबनी–विराटनगर रेलमार्गसमेत छन् ।
