बैतडी । राष्ट्रिय जनमोर्चा बैतडीका अध्यक्ष वीरेन्द्र भण्डारीले पार्टीका केन्द्रीय अध्यक्ष चित्रबहादुर केसी धनगढी आउने खबरले सुदूरपश्चिमका नेता कार्यकर्तामा उत्साह छाएको बताउनुभएको छ ।
राष्ट्रिय जनमोर्चाले एमसीसी खारेजी, संघीयताको विरोध, महंगी, भ्रष्टाचार लगायतका विषयलाई समेटी यही असोज २० गते सातै प्रदेशका मुकाममा विरोध सभाको आयोजना गर्दैछ । सोही कार्यक्रम अन्तर्गत धनगढीमा हुने विरोध सभालाई सम्बोधन गर्न अध्यक्ष केसी धनगढी आउने कार्यक्रम छ ।
सोमबार युगदर्शनसँग कुरा गर्दै जिल्ला अध्यक्ष भण्डारीले अहिले आफूहरु सो कार्यक्रमको तयारीमा जुटेको बताउनुभयो । उहाँले पहाडी जिल्लाबाटसमेत अध्यक्ष केसीले सम्बोधन गर्ने कार्यक्रममा सहभागी हुन कार्यकर्ताहरु लालायित भएको बताउनुभयो ।
यस्तै, अध्यक्ष भण्डारीले केही दिनअघि आफ्नो नामबाट प्रकाशित भएको विज्ञप्तिप्रति भ्रममा नपर्न पनि आग्रह गर्नुभएको छ । उहाँले राष्ट्रिय जनमोर्चाको नीति, सिद्धान्त र संगठनबाट अलग हुने कुरा आफूलाई स्वीकार्य नहुने पनि स्पष्ट पार्नुभएको छ ।
‘हाम्रो पार्टीको जुन राष्ट्रवादी र जनताप्रति समर्पित छवी छ, त्यसको तुलनामा संगठन अलि कमजोर भयो । यसलाई व्यवस्थित र बलियो बनाउनुपर्छ भन्ने मेरो मान्यता हो’ अध्यक्ष भण्डारीले युगदर्शनसँग भन्नुभयो, ‘साथीहरुले यस्तै कुरा गरेको हुनाले मैले पनि विज्ञप्ति निकालेर सहमति जनाएको थिएँ । तर, पार्टी नेतृत्वलाई दबाब दिने नाममा संगठनमा फुट पार्ने उनीहरुको उद्देश्य रहेछ । उहाँहरुको खराब नियत बुझेपछि मैले समर्थन नगर्ने निर्णय गरेँ ।’
अध्यक्ष भण्डारीले राजमो बैतडी जिल्ला समिति चित्रबहादुर केसी नेतृत्वको राष्ट्रिय जनमोर्चाप्रति प्रतिवद्ध र एकताबद्ध रहेको पनि स्पष्ट पार्नुभयो ।
यस्तै, राजमो बैतडीका पुराना नेता अर्जुनसिंह मडैले पनि फुटपरस्त गतिविधिप्रति राजमो बैतडीले समर्थन नगर्ने बताउनुभयो । उहाँले नेकपा (मसाल) र राष्ट्रिय जनमोर्चा जत्तिकै अनुशासित तथा जनताप्रति समर्पित पार्टी अरु कुनै नरहेको भन्दै पार्टीमा फुट पार्ने ‘अपराध’ नगर्न आग्रह गर्नुभएको छ ।
साथै राजमो नेता कार्यकर्ताहरुलाई कुनै भ्रममा नपरी अध्यक्ष केसी नेतृत्वप्रति प्रतिवद्ध रहन पनि आग्रह गर्नुभएको छ ।
यो पनि…….फुटपरस्त प्रवृतिलाई निस्तेज पार्न सुदूरपश्चिमका राजमो जिल्ला समितिहरूको अपिल
