काठमाडौं । राष्ट्रिय जनमोर्चाका अध्यक्ष चित्रबहादुर केसी यही असोज २० गते धनगढी जानुहुने भएको छ । राष्ट्रियताको रक्षा र संघीयताविरुद्ध राजमो सुदूरपश्चिम प्रदेश समितिले धनगढीमा आयोजना गर्ने विरोध सभामा केसीले सम्बोधन गर्ने कार्यक्रम छ ।
त्यसक्रममा धनगढीमा जुलुशसहित विरोध प्रदर्शन समेत गरिने छ । दिउँसो १२ बजे धनगढी चौराहबाट जुलुश सुरु गरि पार्कमोडमा पुगेर सभामा परिणत हुने राष्ट्रिय जनमोर्चा सुदूरपश्चिम प्रदेश समितिका अध्यक्ष नन्दराज भट्टले जानकारी दिनुभएको छ ।
राजमोले गणतन्त्र, राष्ट्रियताको रक्षा, संघीयताको खारेजी, देशमा बढ्दो महङ्गी तथा भ्रष्टाचारका विरुद्ध देशब्यापी कार्यक्रम सञ्चालन गरिरहेको छ भने प्रवासमा समेत सो आन्दोलनप्रति ऐक्यवद्धता जनाउन नेपाली एकता समाजले विभिन्न देशमा कार्यक्रम गरिरहेका छन्।
‘गणतन्त्र, राष्ट्रिय स्वाधीनताको रक्षा गरौँ, संघीयता खारेज गरौँ’ भन्ने मुख्य नारा अन्तर्गत असोज २० गते एकैदिन देशका ७ वटै प्रदेशका मुकाममा प्रादेशिक स्तरका सभाहरु गर्ने राजमो केन्द्रीय समितिले निर्णय गरेको हो । त्यसका लागि केन्द्रीय स्तरबाटै वक्ताहरु पठाउने ठेगान गरेको छ ।
जसमा सुदूरपश्चिम प्रदेशको धनगढीमा हुने सभालाई अध्यक्ष केसी, कर्णाली प्रदेशको सुर्खेतमा कार्यकारी अध्यक्ष रश्मीराज नेपाली, लुम्बिनी प्रदेशको बुटवलमा उपाध्यक्ष जनकराज शर्मा र गण्डकी प्रदेशको पोखरामा नेकपा (मसाल) का केन्द्रीय प्रवक्ता रामप्रकाश पुरीले सम्बोधन गर्ने कार्यक्रम छ ।
यस्तै, वागमतीको काठमाडौंमा राजमो उपाध्यक्ष तथा सांसद दुर्गा पौडेल, २ नं प्रदेशको बीरगञ्जमा अखिल नेपाल किसान महासंघका केन्द्रीय अध्यक्ष भैरवराज रेग्मी र १ नं प्रदेशको इटहरीमा अखिल नेपाल महिला संघकी केन्द्रीय अध्यक्ष तथा संविधान सभा सदस्य मीना पुनले सम्बोधन गर्ने कार्यक्रम रहेको छ ।
यसैबीच, अघिल्लो महिना बुटवलमा आयोजित एक कार्यक्रममा सहभागी हुने क्रममा कोरोना संक्रमित भएर अस्वस्थ भएका राष्ट्रिय जनमोर्चाका सबै नेताहरु संक्रमणमुक्त हुनुभएको खबर प्राप्त भएको छ । हाल धनगढीमा रहनुभएका राजमो महासचिव मनोज भट्टलगायत सबै नेताहरुको पछिल्लो पीसीआर रिपोर्ट निगेटिभ आएको छ । उहाँहरु २० गतेको कार्यक्रमको तयारीमा हुनुहुन्छ ।
यो पनि : राष्ट्रियताको रक्षा र संघीयताविरुद्ध राजमोद्वारा सातै प्रदेशमा सभा, धनगढीमा केसीले सम्बोधन गर्ने
