काठमाडौँ । वैदेशिक रोजगारीका लागि इजरायल जान लिखित परीक्षा पास भएर पनि अन्तरवार्तामा छुटेका ५१ जनाले पुनः परीक्षामा सहभागी हुने मौका पाएका छन् ।
वैदेशिक रोजगार विभागले किरिया तथा सुत्केरीलगायतका कारणले विगतमा अन्तरवार्तामा छुटेकालाई सहभागी हुने अवसर मिलाएको हो ।
प्रतिनिधि सभा, उद्योग तथा वाणिज्य र श्रम तथा उपभोक्ताहित समितिको २०७८ असोज ८ गते बसेको बैठकमा श्रम, रोजगार तथा सामाजिक सुरक्षा मन्त्रालयका सचिव सूर्यप्रसाद गौतम र वैदेशिक रोजगार विभागका महानिर्देशक दीपक काफ्लेले सो जानकारी दिनुभएको हो ।
विभागले लिएको लिखित परीक्षामा छ हजार ३१७ सहभागीमध्ये दुई हजार ३९ लिखित परीक्षामा उत्तीर्ण भएका थिए । विभागले यही असोज १ गतेदेखि ३ गतेसम्म उचाइ र तौलको परीक्षा लिएकामा त्योबिचमा छुटेका व्यक्तिलाई अन्तरवार्ता अवधिभरलाई अवसर दिइएको छ ।
छुटेका परीक्षार्थी असोज ८ गतेसम्म आवेदन लिएर असोज ९ गतेसम्म अन्तरवार्तामा सहभागी हुन पाउने भएका हुन् । (रासस)
