कमल पौडेल, खलङ्गा ।
नेपाल कम्युनिस्ट पार्टी (मसाल) का महामन्त्री मोहनविक्रम सिंहले कम्युनिस्ट नेता खगुलाल गुरुङ कम्युनिस्ट आन्दोलनको अविचल योद्धा भएको बताउनुभएको छ ।
गुरुङलाई दाहसंस्कार गर्नुपूर्व उहाँकै निवास प्युठानको कैरामा असोज ४ गते आयोजि श्रद्धाञ्जली सभामा शोकमन्तव्य राख्दै महामन्त्री सिंहले यस्तो धारणा राख्नुभएको हो ।
‘उहाँ कम्युनिस्ट आन्दोलनको अविचल योद्धा हुनुहुन्थ्यो’ महामन्त्री सिंहले भन्नुभयो– ‘उहाँजस्ता कम्युनिस्ट अब हामीले पाउन गाह्रो छ ।’
महामन्त्री सिंहले खगुलाल गुरुङ प्युठानको मात्रै नभएर नेपाली कम्युनिस्ट आन्दोलनकै सहयात्री भएको बताउनुभयो ।
‘जबसम्म उहाँ सामान्य रूपमा हिँड्डुल गर्न सक्नुहुन्थ्यो’ सिंहले भन्नुभयो– ‘तबसम्म उहाँले पार्टीले दिएको जिम्मेवारी पूरा गर्नुभयो ।’
शोकमन्तव्यको क्रममा उहाँले गुरुङ कम्युनिस्ट आन्दोलनमा आफ्नो सहयात्री पनि भएको बताउनुभयो ।
‘उहाँ मेरो सहयात्री हुनुहुन्थ्यो, उहाँले र मैले करिब ७५ वर्ष लामो समयसम्म सहकार्य गरेका थियौँ’ महामन्त्री सिंहले भन्नुभयो– ‘उहाँको निधन भएपछि मलाई मेरो एउटा हात गुमेको जस्तो महसुस भइरहेको छ ।’
श्रद्धाञ्जली सभामा गुरुङलाई राष्ट्रिय जनमोर्चाकी केन्द्रीय उपाध्यक्ष, प्रवक्ता तथा प्रतिनिधि सभाकी सांसद दुर्गा पौडेल, राजमो केन्द्रीय सदस्य तथा लुम्बिनी प्रदेश सांसद तारा जिसि, राजमो केन्द्रीय सदस्य कृष्ण खड्का र राजमो लुम्बिनी प्रदेश अध्यक्ष बोमबहादुर खत्रीले शोकमन्तव्य राख्नुभएको थियो ।
त्यसैगरी श्रद्धाञ्जली सभामा झिमरुक गाउँपालिकामा राजमोका अध्यक्ष तिलक जिसि, मल्लरानी गाउँपालिकामा राजमोका निर्वाचित अध्यक्ष अमरध्वज राना, राजमो केन्द्रीय सदस्य पद्मा पण्डित, जिल्ला समन्वय समिति प्युठानका प्रमुख केशवराज आचार्य, अखिल (छैठौं) का केन्द्रीय सचिव सुवास जिसी, नेकपा (एमाले) का मानबहादुर जिसी, नेपाली काङ्ग्रेसका गुमानसिंह जिसी, नेकपा (माओवादी–केन्द्र) का प्रतिनिधि टी.एस. गुरुङ, नेकपा (विप्लव पक्ष) का चिन्तामणि घिमिरेका साथै गुरुङका छोरानातिलगायतले श्रद्धाञ्जली दिनुभएको थियो ।
श्रद्धाञ्जली कार्यक्रमको अध्यक्षता नेकपा (मसाल) प्युठानका प्रवक्ता ज्ञानुराम न्यौपानेले गर्नुभएको थियो भने सञ्चालन राष्ट्रिय जनमोर्चाका जिल्ला सचिव विदुर मल्लले गर्नुभएको थियो ।
ज्येष्ठ कम्युनिस्ट नेता खगुलाल गुरुङको १०४ वर्षको उमेरमा २०७८ असोज ३ गते बिहान लुम्बिनी प्रादेशिक अस्पतालमा बुटवलमा निधन भएको थियो ।
