टेकराज भुसाल, बुटवल ।
ज्येष्ठ कम्युनिस्ट नेता खगुलाल गुरुङको २०७८ असोज ३ गते बिहान १०४ वर्षको उमेरमा निधन भएपछि आजै राष्ट्रिय जनमोर्चा लुम्बिनी प्रदेश समितिले बुटवलमा श्रद्धाञ्जली कार्यक्रम सम्पन्न गरेको छ ।
श्रद्धाञ्जली कार्यक्रममा राष्ट्रिय जनमोर्चाका अध्यक्ष तथा पूर्व उपप्रधानमन्त्री चित्रबहादुर केसीले खगुलाल गुरुङले राणाशासनका विरुद्ध कम्युनिस्ट पार्टीमा समेत आबद्ध भई प्युठानमा कम्युनिस्ट पार्टी जन्माउनमा ठुलो भुमिका खेलेको बताउनुभयो ।
खगुलाल गुरुङ कम्युनिस्ट विचार, सिद्धान्त र अनुशासनमा अडिग कम्युनिस्ट नेता भएको बताउँदै अध्यक्ष केसीले गुरुङले पार्टीप्रति दिनुभएको योगदानलाई हामीले बिर्सन नहुने र उहाँले देखाएको बाटोमा सधैँ हिड्ने प्रतिबद्धतासमेत व्यक्त गर्नुभयो ।
श्रद्धाञ्जली कार्यक्रममा वामपन्थी नेता सुरेश थापा, राजमो लुम्बिनी प्रदेशकी सांसद तारा जिसी, अखिल नेपाल किसान महासङ्घका उपाध्यक्ष चन्द्रबहादुर केसी, जातीय समता समाजका अध्यक्ष राजेश विश्वकर्मा, अखिल नेपाल उद्योग व्यापार सङ्घका अध्यक्ष ढुण्डिराज शर्मा, अखिल नेपाल ट्रेड युनियन महासङ्घ (अन्टुक) रुपन्देहीका अध्यक्ष कविराज गिरी, रक्तिम सांस्कृतिक अभियान रुपन्देहीका उपाध्यक्ष दिलिप रसाइली र अखिल (छैठौं) का केन्द्रीय सदस्य सरोजमान सिंहले श्रद्धाञ्जली मन्तव्य राख्दै जीवनभरि नै समाजलाई बदल्न र समाजमा विद्यमान अन्याय, अत्याचार, शोषण र उत्पीडनको अन्त्य गरी सुखी र उन्नत समाज निर्माणका लागि गुरुङ सधैँ सङ्घर्षरत रहेको बताउनुभयो ।
कार्यक्रम राष्ट्रिय जनमोर्चा लुम्बिनी प्रदेश समितिका उपाध्यक्ष बद्रे आलमको अध्यक्षता, सचिव सोमकुमार कार्कीको सञ्चालन र कोषाध्यक्ष गणेश गैतमको स्वागतमा सम्पन्न भएको थियो ।
प्युठानको गौमुखी गाउँपालिका–८ खैरामा १९७५ भाद्र २५ गते जन्मेका गुरुङ २००७ सालदेखि नेपालको प्रजातान्त्रिक आन्दोलनमा सहभागी भई २०१० सालमा नेपाल कम्युनिस्ट पार्टीको सदस्य बनेर लामो समयदेखि नेपाली कम्युनिस्ट आन्दोलनमा आबद्ध रहँदै आउनुभएको थियो ।
