काठमाडौं । नेपाल कम्युनिष्ट पार्टी (मसाल) ले राष्ट्रियता, धर्मनिरपेक्षता र गणतन्त्रको रक्षा तथा जनजीविकाका लागि संयुक्त आन्दोलनको उठान गर्न आह्वान गरेको छ ।
नेकपा (मसाल) को हालै सम्पन्न केन्द्रीय समितिको बैठकले ‘अहिलेको देशको विशिष्ट राजनीतिक अवस्थामा शक्तिशाली जनआन्दोलन उठाउनको लागि व्यापक संयुक्त आन्दोलनको आवश्यकतामाथि जोड’ दिएको हो ।
बैठकपछि महामन्त्री मोहनविक्रम सिंहले शुक्रबार जारी गर्नुभएको वक्तव्यमा ‘सबै देशभक्त, जनतान्त्रिक र वामपन्थी शक्तिहरूको एकताद्वारा नै त्यस प्रकारको संयुक्त आन्दोलनको निर्माण हुन सक्ने छ’ भन्दै तर त्यस प्रकारको संयुक्त आन्दोलनको सिलसिलामा राजावादीहरूसित कुनै पनि एकता नगर्ने स्पष्ट पार्नुभएको छ।
मसालले वर्तमान सरकार अर्धसामन्ती र अर्धऔपनिवेशिक व्यवस्था र संसदीय प्रणालीअन्तर्गत बनेको सरकार हो भन्ने विषयमा कुनै भ्रम राख्न आवश्यक नरहेको बताएको छ । त्यसकारण देश र जनताका आधारभूत समस्याहरूको त्यो सरकारद्वारा समाधान हुन नसक्ने कुरा प्रष्ट छ । तैपनि, ओलीद्वारा देशका अगाडि उपस्थित गम्भीर खतराको सन्दर्भमा यो सरकारको सकारात्मक महत्व रहेको मसालको निष्कर्ष छ ।
वक्तव्यमा भनिएको छ, ‘अहिले एमालेको सम्पूर्ण जोड निर्वाचनमा जाने र त्यसद्वारा दुई तिहाई बहुमत प्राप्त गर्नेतिर केन्द्रित छ । त्यसरी संविधानमा आफ्नो इच्छाअनुसार संशोधन गर्नको लागि पनि उनीहरूले मार्ग प्रशस्त गर्न चाहन्छन् ।
निर्वाचनमा त्यसरी विजय भएमा उनीहरूले राजतन्त्र र हिन्दुराष्ट्रको पुनस्र्थापनाको लागि संविधानमा संशोधन गर्ने तथा लिपूलेक, कालापानी र एमसीसी समेतबारे राष्ट्रघाती सौदावाजी गर्ने सम्भावना रहने छ ।’
यो पनि… ‘छद्मभेसमा पार्टी ध्वस्त पार्न असफल भएपछि प्रकट रुपमा समानान्तर गतिविधि’
