काठमाडौं । नेकपा (एमाले) भित्रको गुटबन्दीमा १० बुँदे सहमतिमार्फत माधव नेपालको साथ छोडेर एमालेमै बस्न चाहेका नेताहरू पार्टी अध्यक्ष केपी ओलीको पेलाइमा परेका छन् । पार्टीलाई २ जेठ २०७५ को अवस्थामा राखेर अगाडि बढ्ने सहमति गरेका ओलीले अहिले आएर हुबहु त्यसको कार्यान्वयन नहुने स्पष्ट पार्नुभएको छ ।
पार्टीभित्रको विवादका क्रममा उपाध्यक्षहरू भीम रावल, अष्टलक्ष्मी शाक्य, युवराज ज्ञवाली, नेताहरु भीम आचार्य, सुरेन्द्र पाण्डे, गोकर्ण विष्ट, योगेश भट्टराईले माधव नेपालको साथ दिँदै आएका थिए । केपी ओलीलाई प्रधानमन्त्री पदबाट हटाउन यी नेताहरूको पनि महत्वपूर्ण भूमिका छ ।
तर, माधव नेपालले नेकपा (एकीकृत समाजवादी) गठन गर्ने क्रममा भने उनीहरुले नेपालको साथ छोडेर १० बुँदे सहमतिमार्फत एमालेमै फर्कन चाहेका थिए । सो सहमति अनुसार नेकपा (एमाले) का नेताहरु माओवादीसँग एकता हुनुपूर्वको अवस्थाकै जिम्मेवारीमा रहने भन्ने थियो।
त्यसो गर्दा सुदूरपश्चिम प्रदेशको इन्चार्ज भीम रावल बन्नुहुन्थ्यो । तर, ओलीले रावललाई होइन, माओवादीबाट आएका लेखराज भट्ट नै सुदूरपश्चिमको इन्चार्ज बन्ने र १० बुँदे हुबहु कार्यान्वयन नहुने स्पष्ट पार्नुभएको छ ।
रावलसँगै विभाजनको विपक्षमा उभिएका अष्टलक्ष्मी शाक्य र भीम आचार्यले मुख्यमन्त्री पद पाए पनि त्यो पद अहिले धरापमा परेको छ ।
यस्तै, सुरेन्द्र पाण्डे र गोकर्ण बिष्टलाई कुनै जिम्मेवारी दिइएको छैन भने योगेश भट्टराई प्रचार विभाग प्रमुखमा यथावत् रहनुभएको छ । युवराज ज्ञवाली उपाध्यक्षमा कायमै रहेपनि विशेष जिम्मेवारी भने दिइएको छैन ।
‘ओलीले १० बुँदे सहमति टांगमुनी राख्छन्’ भन्ने माधव नेपालको भनाई अहिले चरितार्थ भएको छ । अन्तिममा नेपालको साथ छोडेर एमालेमै रहन चाहेका नेताहरू अहिले जिम्मेवारीविहीन भएपछि अध्यक्ष ओलीसँग रुष्ट भएका छन् ।
