जनकराज पौडेल ##
जनताका झुग्गीझुपडीमा
न्याय र समानताका आवाज बुलन्द गर्दै
सर्वहारा वर्गको राज्य ल्याउने
सुन्दर युगको परिकल्पना गर्दै
गाउँबस्ती जगाउदै
जनता सचेत पार्दै
आफ्नो कर्तव्य र निष्ठामा
इमान्दारिता प्रदर्शन गर्दै
भोक, रोग, अभावको पर्वाह नगरी
विदेशका गल्लीगल्तीमा
नेपाली एकताको सन्देश छर्दै
चेतनाको दियो जलाउँदै
सदियौँदेखि पिल्सिएका
दासताको बन्धनमा बाँधिएका
पेट पाल्न विदेश पसेका
गल्ली गल्लीमा तड्पिएका
उत्पीडनको भुँवरीमा परेका
सङ्गठित एकताको
महत्त्व बुझाउँदै हिँड्ने
तिमीप्रति श्रद्धासुमन।

तिम्रो त्यो निश्छल भावना
त्याग र बलिदान
राष्ट्र र जनताप्रतिको समर्पण
निमुखाप्रतिको अटुट प्रेम
इमान्दारिताको दुरुपयोग गर्दै
कतै तिमीप्रति
कुठाराघात त हुँदै छैन ?
तिम्रो प्राकृतिक इमान्दारितामा
थरिथरि रङ भर्दै
कतै कृतिम बनाइदै त छैन ?
तिम्रै गुनगान र श्रद्धाको आवरणमा
तिम्रा अधुरा सपना
इच्छा आकाङ्क्षा विरुद्ध
विश्वासघात त गरिँदै छैन ?
तिम्रो रगत पसिनामा सिँचिएको
शिखर चड्ने गोरेटो
कतै अप्ठ्याराका लागि छोडिएको त छैन?
त्यसैले तिमी जहाँ छौ
जुन अवस्थामा छौ
बाटो बिराउँदा
अर्को बाटो हिँड्दा
फेरि पनि त्यही बाटोको दाबी गर्दा
छलछाल गर्दै भ्रम पार्दा
झक्झकाउनू, खबरदारी गर्नू
कान समातेर ट्रयाकमा ल्याउनू
तिमीप्रति औधि विश्वास छ
तिमी हिजो पनि
आज पनि
र भोलि पनि हाम्रो प्रेरणा हौ
तिम्रो बाटो नै महान् छ
हामी हिँडिरहेका छौ
हिडिरहने प्रण गर्दछौँ
त्यसो गर्न सक्यौ भने मात्र
तिमीले पनि आफूप्रति
सच्चा श्रद्धा भएको ठान्ने छौँ
त्यही हामीले पनि विश्वास गरेका छौँ
सहिद तिमीप्रति श्रद्धासुमन छ