काठमाडौँ । जातीय समता समाजले भदौ ८ र ९ गते राजमोको कथित सुदूर पश्चिम भेलाप्रति आफ्नो सङगठनको समर्थन नरहेको बताएको छ ।
सुदूर पश्चिम प्रदेश समितिको नाममा तिलक परियारले वक्तव्य जारी गर्दै उक्त भेलालाई समर्थन भएको दाबी गरेपछि जातीय समता समाजले त्यसलाई खारेज गरेको हो ।
अध्यक्ष राजेश विकको हस्ताक्षरमा २०७८ भदौ १० गते प्रेसवक्तव्य जारी गर्दै यस्तो जानकारी दिइएको छ ।
कथित भेलाद्वारा लोकेन्द्र लम्साल नेतृत्वको राजमो प्रदेश समितिलाई जातीय समता समाजले समर्थन नगरेको जानकारी दिइएको सो प्रेसवक्तव्यको पूर्ण पाठ यस्तो छ–
“जातीय समता समाज सुदूर पश्चिम प्रदेश समितिको नाममा तिलक परियारद्वारा आज जारी गरिएको वक्तव्यप्रति जातीय समता समाज, केन्द्रीय समितिको ध्यानाकर्षित भएको छ । उक्त वक्तब्यमा यही भदौ ८ र ९ गते धनगढीमा सम्पन्न भएको राष्ट्रिय जनमोर्चाको प्रदेशस्तरीय भेला वैधानिक भएको र त्यसलाई जातीय समता समाजले समर्थन गरेको दाबी गरिएको छ । हामी के स्पष्ट गर्न चाहन्छौँ भने त्यो भेला पार्टीकेन्द्रको विरुद्धमा रहेका र कारबाहीमा परेका केही असन्तुष्ट मानिसद्वारा आयोजना गरिएको भेला भएकाले त्यो भेलाले चुनेको क्षेत्रीय समिति अवैधानिक रहेको छ । त्यसैले जातीय समता समाज केन्द्रीय समितिले उक्त भेला र त्यसद्वारा लोकेन्द्र लम्सालको अध्यक्षतामा निर्वाचित नयाँ समितिलाई समर्थन गरेको छैन । अतः जातीय समता समाज केन्द्रीय समिति सबै मातहतका समिति र सम्पूर्ण सदस्यलाई उक्त फुटपरस्त वक्तव्यको भ्रममा नपर्न अनुरोध गर्दछ ।”
त्यस्तै, समता समाजले जनवादी गायक जेबी टुहुरोको निधनप्रति भावपूर्ण श्रद्धाञ्जली व्यक्त गरेको छ । वक्तव्यमा शोकसन्तप्त परिवारप्रति समवेदना पनि प्रकट गरिएको छ ।
