काठमाडौँ । प्रदेश नं. १ मा नयाँ मुख्यमन्त्रीको रूपमा नेकपा (एमाले) का सचिव भीम आचार्यले पद तथा गोपनियताको शपथ लिएका छन् ।
२०७८ भदौ १० गते बिहानै बसेको एमाले प्रदेश नं. १ संसदीय दलको बैठकबाट सर्वसम्मत संसदीय दलको नेतामा चयन भएका आचार्यलाई प्रदेश प्रमुख सोमनाथ अधिकारी प्यासीले मुख्यमन्त्रीको रूपमा शपथ गराएका हुन् ।
आचार्यलाई निवर्तमान मुख्यमन्त्री शेरधन राईको प्रस्तावमा संसदीय दलको नेता बनाइएको हो । आचार्य दलको नेता चयन भएपछि राईले प्रदेश प्रमुख सोमनाथ प्यासीकहाँ मुख्यमन्त्रीबाट भदौ १० गते नै राजीनामा बुझाएका थिए ।
आचार्यले प्रदेश सभाको बहुमतप्राप्त संसदीय दलको नेताको हैसियतमा धारा १६८ (१) बमोजिम मुख्यमन्त्रीको रूपमा शपथ लिएका हुन् ।
एमाले विभाजनपछि प्रदेश नं. १ को संसदीय दलको बैठक पहिलो पटक बसेको थियो । माधवकुमार नेपालको साथ छोडेर एमालेमै रहने निर्णय गरेपछि आचार्यलाई भदौ १० नै मुख्यमन्त्री बनाइएको छ ।
नेपाल समूहमा प्रदेश नं. १ का १५ सांसद रहेको उक्त समूहको दाबी छ । आचार्यलाई मुख्यमन्त्री बनाउँदा त्यसको ठुलो सङ्ख्या आफूले एमालेमै राख्ने आचार्यले दाबी गर्दै आएका छन् ।
प्रदेश संसदमा एमालेका ५१, काङ्ग्रेसका २१, माओवादी–केन्द्रका उपसभामुखसहित १५, जनता–समाजवादी पार्टीका ३, राप्रपा र सङ्घीय लोकतान्त्रिक मञ्चको १÷१ जना सांसद छन् । यसअघि माओवादी–केन्द्र संसदीय दलका नेता टङ्क आङ्बुहाङ एमालेमा प्रवेश गरेपछि उनी कारबाहीमा परेका छन् ।
मुख्यमन्त्री बन्नका लागि ४७ जना सांसद आवश्यक पर्छ । एमालेका ५१ मध्ये १ जना सभामुख, १ जना गुलेफुन मियाँलाई मुद्दा लागेको कारण हाल एमालेका ४९ जना मात्रै सांसद छन् ।
