काठमाडौं । एक भारतीय नागरिकले नक्कली नेपाली नागरिकता बनाएर करोडौं रुपैयाँ ठगी गरेको पाइएको छ । भारत हिमाञ्चल प्रदेश रामपुर गसेरा सिम्ला जिल्ला नोगली पञ्चायत घर भएका रवि कुमार सिंहले नक्कली नेपाली नागरिकता बनाएर दर्जनौं नेपालीलाई ठगी गरेका हुन्।

उनको नागरिकता प्रमाणपत्रमा उल्लेख जिल्ला कैलाली टिकापुर नगरपालिका वडा न. ९ र जन्मस्थान सुर्खेत साविक लाटीकोईली गाविस वडा नं. ७ उल्लेख भएको प्रतिलिपी प्रहरीले फेला पारेको छ ।

सिंहलाई प्रहरीको अपराध महाशाखाले ललितपुरको महालक्ष्मी नगरपालिका–५ सेतीपाखाबाट पक्राउ गरेको हो। उनीविरुद्ध विभिन्न घटनामा करोडौं रुपैयाँ ठगी गरेको उजुरी परेको छ।

यस्तो छ उनको ठगी धन्दा
१) प्रहरीका अनुसार उनले बुटवलका हरी मल्ल र महेन्द्र कुमार श्रेष्ठलाई बुटवल–नाराणघाट सडकखण्डको दायाँबायाँको रुख कटानको सब कन्ट्रयाक्छ छ भनि ‘चाइना स्टेट कन्स्ट्रक्सन इन्जिनियरिङकर्पोरेसन लिमिटेड (सीएससीईसी) को कागजात देखाई अञ्जली कन्स्ट्रक्सन र रवि कुमार सिंहको साझेदारी हो भनी आफूसँग लगानी गरेमा मुनाफाको ४० प्रतिशत दिउँला भनी ४३ लाख ७३ हजार रुपैँया लिई खातामा पैसा नभएको कुमारी बैंकको चेक दिई ठगी गरेका छन्।

२) यस्तै, रुपन्देहीकै लुम्बिनी साँस्कृतिक नगरपालिका–६ बस्ने अनिल गुरुङ भन्ने कृष्ण बहादुर गुरुङलाई अञ्जुली कन्स्ट्रक्सनको म्यानेजिङ डाइरेक्टर हुँ भनी उनको बा १२ च ३८५९ नं. को स्विफ्ट डिजाइर कार मासिक रु. ९० हजार भाडा दिने भनी २०७६ वैशाखमा लगी सम्पर्क विहिन भएका थिए। सो कार भक्तपुरका प्रदिप रायलाई नक्कली ब्लुबुक देखाई बिक्री गरेर ८ लाख ३५ रुपैयाँ ठगी गरेका थिए।

३) यसैगरी चुरियामाई ईन्टरप्राइजेज जडिबुटी, काठमाडौँका सञ्चालक कृष्णहरी गौतमसँग बजाज कम्पनीको बा ९५ प १६८ नं। को डोमिनार–४०० सिसीको मोटरसाइकल ३ लाख ३० हजार रुपैयाँमा खरिद गर्ने भनी ३० हजार दिई बाँकी पैसा पछि दिन्छु भनी गत पुस २९ गतेबाट सम्पर्क विहीन भई ठगी गरेका थिए।

४) यता धनुषाको जनकपुरधाम उपमहानगरपालिकास्थित न्यू साह एण्ड ईन्टरप्राइजेजका सञ्चालक प्रदिप कुमार साहलाई ‘रोयल हाइड्रो कन्स्ट्रक्सन प्रालि’ को म्यानेजिङ डाइरेक्टर हुँ भनी भिजिटिङ कार्ड समेत देखाई मारुती सुजुकी कम्पनीको प्रदेश–३–०१र ०२३ च ००५० नं. को ब्रिज्जा कार मासिक १ लाख ५० हजार रुपैयाँ भाडा दिन्छु भनी लगी सम्पर्कविहीन भई ठगी गरेका थिए। उक्त कार रवि कुमार सिंह सहित प्रहरीले नियन्त्रणमा लिएको छ।

५) यसैगरी काठमाडौंको लाजिम्पाट स्थित ‘रोयल हाइड्रो कन्स्ट्रक्सन प्रालि’ को नक्कली लेटरप्याड, कम्पनीको छाप, नक्कली दस्तखत प्रयोग गरी आफूलाई संस्थापक अध्यक्ष हुँ भनी विभिन्न व्यक्तिहरूलाई करिब एक करोड रुपैयाँ ठगी गरेको भनी कैलालीको घोडाघोडी नगरपालिका–१ स्थाई घर भई हाल लाजिम्पाट बस्ने ‘रोयल हाइड्रो कन्स्ट्रक्सन प्रालि’ का संस्थापक अध्यक्ष सुरेन्द्र बहादुर शाही र प्रेम बहादुर शाहीले निवेदन दिएका प्रहरीले जनाएको छ।

प्रारम्भिक अनुसन्धानको क्रममा उनले देवी प्रसाद सिंहको छोरा जिल्ला कैलाली टिकापुर नगरपालिका–९ र जन्मस्थान सुर्खेत साविक लाटीकोईली गाविस वडा नं. ७ ठेगाना उल्लेख भएका जिल्ला प्रशासन कार्यालय कैलालीबाट जारी नेपाली नागरिकताको प्रमाणपत्र नक्कली भनी खुल्न आएको, सोही नागरिकता पेश गरी विभिन्न बैंकहरूमा खाता खोली ठगी कार्यमा प्रयोग गरेको, उनले सवारी चालक अनुमतिपत्र समेत किर्ते गरी बनाएको खुल्न आएको छ। उनका विरुद्ध महानगरीय प्रहरी परिसर टेकु, काठमाडौँमा बैंकिङ कसूरमा मुद्दा दर्ता भई पक्राउ पुर्जी समेत जारी भएकोले हाल थप अनुसन्धानको लागि महानगरीय प्रहरी परिसर टेकु पठाइएको प्रहरीको भनाई छ।
साथै उनीबाट धेरै व्यक्तिहरू ठगिएको भन्ने बुझिएको र उजुरी आउने क्रम जारी रहेकोले अन्य कोही सो व्यक्तिबाट ठगिमा परेको भए महाशाखामा सम्पर्क गर्न प्रहरीले आग्रह गरेको छ।